პოპვარსკვლავი ლედი გაგა მსოფლიო ჯანდაცვის ორგანიზაციას დაეხმარა, რომ კორონავირუსთან ბრძოლის საქველმოქმედო ფონდისთვის $35 მილიონი შეეგროვებინა: მომღერალი ცნობილ ქველმოქმედებთან და მსხვილი ბიზნესების მფლობელებთან შუამდგომლობდა, რათა მათ თანხა გაეღოთ.

ეს თანხა მთლიანად სამედიცინო პერსონალის ისეთი აღჭურვილობის დამზადებასა და შეძენას მოხმარდება, როგორებიცაა ნიღბები და ხელთათმანები.

ამავდროულად მსოფლიო ჯანდაცვის ორგანიზაციამ ლედი გაგასთან ერთად მუსიკალური ფესტივალი One World Together at Home (მთელი მსოფლიო ერთად სახლში) დააანონსა, რომელიც ონლაინ გადაიცემა სხვადასხვა არხის საშუალებით და მისი მიზანი ამჯერად არა საქველმოქმედო მიზნებისთვის თანხის შეგროვება, არამედ ყველასთვის უსაფრთხოების ზომების დაცვის მოწოდება იქნება.

ფესტივალი 18 აპრილს გაიმართება და მასში ლედი გაგასთან ერთად ისეთი ცნობილი მომღერლები მიიღებენ მონაწილეობას, როგორებიც არიან ბილი აილიში, ლიზო, პოლ მაკარტნი, ელტონ ჯონი და სხვა.

ამასთან დაკავშირებით მსოფლიო ჯანდაცვის ორგანიზაციის დირექტორმა, ტედროს გებრეისუსმა განაცხადა:

"მართალია, რაღაც დროის განმავლობაში ფიზიკურად ერთმანეთთან დაშორებულები უნდა ვიყოთ, თუმცა ვირტუალურად კვლავ შეგვიძლია მუსიკით ვისიამოვნოთ. ეს კონცერტი საერთო საფრთხის წინაშე ჩვენს ერთიან სოლიდარობას აჩვენებს".

ამის შესახებ ინფორმაცია ლედი გაგამაც გაავრცელა ფეისბუქის ოფიციალურ გვერდზე:

"მნიშვნელოვანია, რომ მასშტაბურად ვიფიქროთ და მსოფლიო ჯანდაცვის ორგანიზაციას მხარი დავუჭიროთ, რათა პანდემიის შეჩერება და მომავალი გავრცელების პრევენცია შეძლოს. ასევე კრიტიკულად მნიშვნელოვანია ადგილობრივ საქველმოქმედო ინიციატივებსაც დაუჭიროთ მხარი და ყველაზე დაუცველ ადამიანებს დაეხმაროთ", — წერს მომღერალი თავის განცხადებაში.