12 ნოემბერს ამერიკის კინოაკადემიამ მსახიობ ჯეკი ჩანს საპატიო ოსკარი გადასცა.

ფოტო: BUCKNER/VAR/REX/SHUTTERSTOCK

"ეს ჩემი ოცნება იყო", - თქვა სიტყვით გამოსვლის დროს 62 წლის მსახიობმა, რეჟისორმა, პროდიუსერმა და სცენარისტმა, რომელიც ჩვენთვის თავისი აკრობატული ჩხუბის სტილითა და კომედიის დიდი ნიჭით არის ცნობილი.

"56-წლიანი კარიერის, 200-ზე მეტი ფილმისა და ძალიან ბევრი გატეხილი ძვლის შემდეგ, როგორც იქნა, ოქროს კაცი მე მეკუთვნის. დიდი მადლობა ჰოლივუდს, წლების განმავლობაში თქვენ ძალიან ბევრი რამ მომეცით, მათ შორის - ცოტაოდენი პოპულარობაც", - იხუმრა სცენიდან ჯეკი ჩანმა.

"არ მჯერა, მე ოსკარს ვეხები, ვკოცნი, მის სუნს ვგრძნობ. დიდი მადლობა ჰონგ-კონგსა და ჩემს ჩინელებს" - თქვა მსახიობმა.

ამერიკის კინოაკადემია ყოველწლიურად საპატიო ოსკარს აძლევს იმ ხელოვანებს, რომელთაც კინოინდუსტრიაში განსაკუთრებული წვლილი შეიტანეს.

საპატიო ჯილდოებს სპეციალურად შერჩეული დამოუკიდებელი საბჭო გასცემს და მასში აკადემიის 6000 წევრიდან არც ერთი არ შედის. ცერემონიალზე წარმოდგენილია 3 საპატიო ოსკარი - აკადემიის საპატიო ჯილდო, ჯიმ ჰერშლოტის ჰუმანიტარული ჯილდო და ირვინგ თალბერგის მემორიალური ჯილდო.