მამა შალვა კეკელია აცხადებს, რომ საპატრიარქოს კრიტიკის შემდეგ "უკან მიაქვს" თავისი სიტყვები აღდგომაზე 21:00 საათამდე შეკრებისა და 6:00-ის შემდეგ დაშლაზე. თუმცა, მისივე თქმით, იმავე აზრზე რჩება და აღდგომაზე დისტანციური ქადაგების იდეაც არ მოსწონს.

"არ შეიძლება, არ შეიძლება. ეს არის ღვთის... არ ვიცი, აი... მაშინ მღვდლობა უქმდება, მსახურება უქმდება, რომ მე მარტო მღვდელი დავრჩე საკურთხეველში და აღდგომა დღეს სკაიპით გვიყუროს მრევლმა და ჩვენ ადამიანები არ ვაზიაროთ", — განაცხადა მან რუსთავი 2-თან ინტერვიუში.

მას შემდეგ, რაც შალვა კეკელიას იდეა განხილვის საგანი გახდა, საპატრიარქოში განაცხადეს, რომ მღვდლებმა თავი უნდა შეიკავონ იმ განცხადებებისგან, რომელიც მათთან შეთახნმებული არ არის და ეკლესიის პოზიციას არ ასახავს.

პირველ აპრილს პატრიარქმა ილია მეორემ გაავრცელა მიმართა, რომლის თანახმადაც, ტაძრის კარის დახურვა შეუძლებელია და ღია იქნება მათთვის, ვინც ეკლესიაში მისვლას მოისურვებს, შესაბამისად ჩატარდება სააღდგომო ლიტურგიაც. ტაძრებში წირვა-ლოცვების ჩატარებისთვის კი სასულიერო პირებს სამი რეკომენდაცია სმს-თი გაუგზავნეს.

სამი რეკომენდაცია:

  • კომენდანტის საათის გათვალისწინებით, ხვალიდან ლოცვები დაიწყოს შუა დღის 16:00 საათზე, ხოლო ყოველ დღე ეკლესია დაიკეტოს საღამოს 8 საათისთვის;
  • აუცილებელია ტაძრის ეზოში 1,5მ-ის დაშორებით დროულად გაკეთდეს ნიშნულები;
  • ყოველდღიურად ხშირად უნდა გაიწმინდოს ხატები და სიწმინდეები (სპირტისა და ვარდის წყლით), ასევე, დამუშავდეს იატაკი და ეკლესიაში მუდმივი მეთვალყურეობისთვის გამოიყოს პასუხისმგებელი პირები.

სამთავრობო გუნდი ისევ აცხადებს, რომ საკარანტინო შეზღუდვები ეხება ყველას და სააღდგომო ლიტურგიაზე შეკრებაც საკომენდანტო საათის დარღვევა იქნება, თუმცა 3-ზე მეტი ადამიანის შეკრებისთვის ეკლესიაში არავინ დაუჯარიმებიათ.

მინისტრთა კაბინეტის წევრები უარს ამბობენ ეკლესიაში მისვლაზე და მოქალაქეებსაც სახლში დარჩენისკენ მოუწოდებენ.

ბოლო მონაცემებით, საქართველოში კორონავირუსით ინფიცირების 170 შემთხვევაა დაფიქსირებული. ჯანდაცვის სფეროს წარმომადგენლები ვირუსის გავრცელების პიკს აპრილის ბოლოს, სწორედ საეკლესიო დღესასწაულების დროს ელოდებიან.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: