უზენაესი სასამართლოს პლენუმმა საკონსტიტუციო სასამართლოს მოსამართლედ ხვიჩა კიკილაშვილი აირჩია. ამის შესახებ ინფორმაციას უზენაესი სასამართლო ავრცელებს.

დღეს, 3 აპრილს გამართულ პლენუმის სხდომას უზენაესი სასამრთლოს მოსამართლეთა უმრავლესობა დაესწრო.

რაც შეეხება ხვიჩა კიკილაშვილს, ის საკონსტიტუციოში არჩევამდე, სააპელაციო სასამართლოს წევრი იყო.

როგორც ცნობილია, არასამთავრობო ორგანიზაციები უზენაესი სასამართლოს პლენუმს მოუწოდებდნენ, რომ საგანგებო მდგომარეობის დასრულებამდე, თავი შეეკავებინათ საკონსტიტუციო სასამართლოს მოსამართლის დანიშვნისგან. მათი განმარტებით, საგანგებო მდგომარეობის პირობებში პლენუმის სხდომის დანიშვნა, პროცესზე საზოგადოებრივი მეთვალყურეობის შესაძლებლობას არ იძლეოდა.

საქართველოს კონსტიტუციის თანახმად, საკონსტიტუციო სასამართლოს 9 წევრიდან 3 წევრს უზენაესი სასამართლო ნიშნავს. სწორედ უზენაესი სასამართლოს კვოტით იყო დანიშნული საკონსტიტუციო სასამართლოს მოსამართლე მაია კოპალეიშვილი, რომელსაც უფლებამოსილების 10-წლიანი ვადა 2019 წლის 5 დეკემბერს ამოეწურა. თუმცა, უზენაესმა სასამართლომ კანონის მოთხოვნისა და სამოქალაქო საზოგადოების მოწოდების მიუხედავად, კანონმდებლობით გათვალისწინებულ ვადებში საკონსტიტუციო სასამართლოს ახალი მოსამართლე არ დანიშნა.