გურჯაანელი კაკო ჯეირანაშვილის ისტორიამ, რომელიც პანდემიის გამო ტიტებს ვეღარ ყიდდა, გუშინ ფეისბუქი მთლიანად მოიცვა. რადიო თავისუფლებასთან საუბარში 63 წლის მეყვავილე ამბობდა, რომ ამ სეზონზე დაახლოებით 2 000 ლარი დაკარგა, მისი 5 000 ტიტა კი ისევ ნაკვეთშია და ჭკნება.

მას შემდეგ, რაც მისი ისტორია მოქალაქეების ყურამდე მივიდა, უამრავ ადამიანს გაუჩნდა დახმარების სურვილი. ინიციატივა ფეისბუქზე თავდაპირველად მომხმარებელმა მარიამ ნატროშვილმა გამოთქვა.

დღეს On.ge-ს კაკოს შვილმა, სოფიო ჯერიანაშვილმა უთხრა, რომ ის თანხა, რასაც მეყვავილე წარმატებულ სეზონებში იღებდა, თითქმის შეგროვებულია:

"იმდენად გახარებულები ვართ... ყველას დიდ მადლობას ვუხდით. ის ნერვიულობა, რომელიც მამას ჰქონდა ეს დღეები და განიცდიდა ამ ტიტების ამბავს... შოკშია, რომ ყველასგან მიიღო ასეთი თანადგომა, თანხით მათ შორის, ყველაფერი ხო სათქმელია, არა? ჯერ ის, რომ ამდენ ადამიანს დააინტერესა, მერე ფინანსურადაც, ყველას რისი შესაძლებლობაც აქვს, ლარიდან დაწყებული, 50 ლარიც კი გადმორიცხეს. აი არ ვიცი, ძალიან დიდი მადლობა ყველას. [სხვა წლებში რომ იღებდა] დაახლოებით არის მოგროვებული ეგ თანხა. ზუსტად არ ვიცი რამდენია, მაგრამ ვიცი, რომ დაახლოებით მაგდენი ჩაირიცხა და მადლობის მეტი რა მეთქმის".

იმედია, რომ კაკო ჯეირანაშვილს ტიტების მოყვანის ხალისი გაუორმაგდება და მომავალ წელს უკვე რეალურადაც შევძლებთ მისგან ყვავილების ყიდვას.