წელს პირველი პირველი აპრილია ბოლო წლების განმავლობაში, როცა თბილისის ზოოპარკი მოქალაქეებს არ ტროლავს. სამაგიეროდ, ტრადიციული ცრუპენტელობის ნაცვლად კარგი ნამდვილი ამბავი გვახარეს:

"ზოოპარკში უსაყვარლესი, ხუჭუჭა კოზაკი გაგვიჩნდა. არც სამი კუზი აქვს, არც რქა და არც ხმალკბილა ვეფხვისნაირი კბილები. ცოტა მინჯღრეულ-მონჯღრეულია, როგორიც უნდა იყოს-კიდეც, ახალშობილი აქლემი, ანუ, ძალიან გრძელი ფეხები აქვს და ფეხებთან შედარებით მომცრო, კუზიანი ტანი, მაგრამ აქლემური ესთეტიკური საზომით და ჩვენი შეფასებითაც — უმშვენიერესია".

დრომედარები, იგივე ერთკუზიანი აქლემები თბილისის ზოოპარკში 2019 წლის შემოდგომაზე ყაზახეთიდან ჩამოიყვანეს. ზოოპარკს სულ ხუთი ახალი აქლემი შეემატა. ცხოველები ამ პერიოდში ფილმშიც გადაიღეს და როგორც ზოოპარკი ფეისბუქის გვერდზე წერს, "სამსახიობო ნიჭითა და ოსტატობით კუზებგამოტენილმა აქლემებმა გადასარევად გაართვეს თავი დაკისრებულ მოვალეობას".

რამდენიმე დღის წინ დაბადებულ პატარა მამრ კოზაკს სახელი ჯერ არ აქვს. ესეც ხუჭუჭა ახალშობილი მის უდიდებულესობა, დედასთან ერთად.