კორონავირუსთან გლობალური ბრძოლის ფარგლებში ევროკომისია აღმოსავლეთ პარტნიორობის ქვეყნებს: საქართველოს, სომხეთს, აზერბაიჯანს, მოლდოვას, უკრაინასა და ბელარუსს გადაუდებელი საჭიროებებისთვის 140 მილიონ ევროს გამოუყოფს. ამის შესახებ ევროკომისიის განცხადებაშია ნათქვამი.

გარდა ამისა, ევროკომისია 700 მილიონი ევროს ღირებულების არსებული ინსტრუმენტების გამოყენებას კოროვირუსით გამოწვეული კრიზისის სოციალურ-ეკონომიკური გავლენის შესამსუბუქებლად გადაამისამართებს.

ევროკომისარმა სამეზობლო პოლიტიკისა და გაფართოების საკითხებში, ოლივერ ვარჰეიმ განაცხადა, რომ ახლა ძალიან რთული დროა არა მხოლოდ ევროკავშირისთვის, არამედ მისი პარტნიორი ქვეყნებისთვისაც.

"ჩვენ ყველანაირად ვცდილობთ, შევამსუბუქოთ კორონავირუსის ეპიდემიის გავლენა ადამიანების ცხოვრებაზე. ჩვენ ვპასუხობთ როგორც ჯანდაცვის სისტემების უშუალო საჭიროებებს, ასევე გრძელვადიან საჭიროებებს საზოგადოებაში ყველაზე დაუცველი ჯგუფებისა და მცირე და საშუალო საწარმოებისთვის, რომლებიც აღმოსავლეთ პარტნიორობის ექვს ქვეყანაში ეკონომიკის საყრდენია", — განაცხადა ევროკომისარმა.