მსოფლიო საპატრიარქო კორონავირუსის გამო მარტის ბოლომდე ყველა რელიგიურ მსახურებას და წესის შესრულებას წყვეტს. ამის შესახებ მსოფლიო პატრიარქმა, ბართლომეომ მიმართვა გაავრცელა.

პატრიარქის მიმართვაში ნათქვამია, რომ შეზღუდვა არ ეხება ღია ეკლესიებში პირად ლოცვებს და ისინი პანდემიის გავრცელების შესაბამისად გადაიხედება.

მსოფლიო საპატრიარქო ყველას მოუწოდებს, რომ დარჩნენ სახლში, მათივე უსაფრთხოებისა და სხვა ადამიანების დასაცავად და სამედიცინო სფეროს წარმომადგენლების მიერ შემოღებული ნორმების დაცვის აუცილებლობაზე მიუთითებს.

ასევე, საპატრიარქო ჯანდაცვის სფეროში მომუშავე ადამიანთა მიმართ პატივისცემას გამოხატავს და კორონავირუსთან ბრძოლაში მათ თავგანწირვას აქებს.

საქართველოს მართლმადიდებელი ეკლესიის საპატრიარქოს განცხადებით, 20 მარტს 12 საათზე სინოდის სხდომა გაიმართება.

15 მარტს ფოთისა და ხობის მიტროპოლიტმა, გრიგოლ ბერბიჭაშვილმა განაცხადა, რომ კორონავირუსთან დაკავშირებული პროცესების გამო სინოდის სხდომა უნდა შეიკრიბოს და ერთიან პოზიციაზე შეჯერდეს. მანვე აღნიშნა, რომ შეხვედრა იმისთვისაცაა საჭირო, რომ გაირკვეს რომელია პატრიარქის კურთხევა და რომელი არა. მისი თქმით, გაურკვეველია ვინ არის ის, ვინც ეკლესიის სახელით საუბრობს, რადგან რეკომენდაციები, რომელსაც ეკლესია გასცემს, პირადად პატრიარქისგან არ მოუსმენია.

"არის იმის საშუალება მგონი, რომ მღვდელმთავრები შევიკრიბოთ და ერთიანი პოზიცია შევიმუშავოთ, როგორ მოვიქცეთ. ჩვენ უნდა ავიღოთ პასუხისმგებლობა ჩვენს მხრებზე, იმაზე თუ ეკლესიაში რა მოხდება", — განაცხადა მან პრესკონფერენციაზე.

კორონავირუსის პრევენციისთვის ერთჯერადი კოვზით ზიარებაზე საპატრიარქომ უარი თქვა, თუმცა განაცხადა, რომ ზიარების შემდგომ სასმლის (სიტკბოების) მიღება მრევლს ერთჯერადი ან საკუთარი ჭიქით შეუძლია. გარდა ამისა, მრევლს მისცეს რეკომენდაცია ყოველ დილას, უზმოზე ნაკურთხი წყალი დალიონ და სახლსა და სამსახურში აპკურონ. ასევე, პატრიარქის გადაწყვეტილებით ყოველ კვირა დღეს, 12 საათზე ყველა ტაძარში უნდა დაირეკოს ზარი და მრევლმა, ეკლესიაში და სხვაგანაც, ერთად ილოცოს.