ეკონომიკის მინისტრის, ნათია თურნავას განცხადებით, გაითვალისწინეს მოქალაქეების კრიტიკა იმაზე, რომ კომერციულ რეისებზე, რომლითაც უცხო ქვეყნებიდან საქართველოში დაბრუნებაა შესაძლებელი, ბილეთის ფასი ძალიან მაღალია. მისი განმარტებით, ვინაიდან კომპანიებს მხოლოდ საქართველოს მოქალაქეები შემოჰყავთ, მათი რეისები ეკონომიკურად მდგრადი არ არის, ამიტომ სახელმწიფო გარკვეულ თანამონაწილეობას გაიღებს და ამ ფინანსებს შეავსებს, რაც ბილეთის ფასს შეამცირებს.

თუმცა, მოქალაქეთა ინფორმირებისთვის, მინისტრი ხაზს უსვამს, რომ რეისები ფასიანი იქნება.

"ჩვენ ყველა საჭირო დახმარებას, იქნება ეს სუბსიდია, თუ რაიმე სხვა სახის დახმარება, ჩვენ ამას გავწევთ. ეს არის სუბსიდია და დახმარება არა რომელიმე კომპანიის, თუმცა არც ამას მოვერიდებით დღესდღეობით, არამედ კონკრეტულად ჩვენი მოქალაქეების", — განაცხადა მინისტრმა.

გარდა ამისა, მთავრობის პრესსპიკერმა, ირაკლი ჩიქოვანმა განაცხადა, რომ საქართველოს საკონსულოები ცდილობენ განსაზღვრონ ის ადგილები, სადაც მოქალაქეთა მეტი კონცენტრაციაა, რაც აძლევთ საშუალებას დაგეგმონ, საიდან განხორციელდება ფრენები. ჩიქოვანის თქმით, მოქალაქეებს მიაწოდებენ ინფორმაციას, კონკრეტულ ქვეყნებში რომელ ქალაქებში უნდა გადავიდნენ იმისთვის, რომ სპეციალური რეისით საქართველოში გამოფრენა შეძლონ.

ფრენების გაუქმების შემდეგ, სხვადასხვა ქვეყანაში დარჩენილმა საქართველოს მოქალაქეებმა არაერთხელ ითხოვეს დახმარება იმისთვის, რომ სამშობლოში დაბრუნდნენ. ისინი აცხადებდნენ, რომ ფინანსები ელევათ და ალტერნატიული მარშრუტების დაფარვის საშუალება არ აქვთ.

ამ ეტაპზე მოქმედებს რამდენიმე კომერციული რეისი, რომელთა განგირს საქართველოს საგარეო საქმეთა სამინისტრო ფეისბუქგვერდზე განახლებად რეჟიმში ავრცელებს.

ეპიდსიტუაცია საქართველოში: შეზღუდვები და რეკომენდაციები

18 მარტის მდგომარეობით, საქართველოში კორონავირუსი დაუდასტურდა 38 ადამიანს, მათ შორის 4 ბავშვია. ამასთან, დადასტურებულ შემთხვევებს შორის ერთი, N1 ინფიცირებული უკვე გამოჯანმრთელდა და ის საავადმყოფოდან 14-დღიანი თვითიზოლაციის რეკომენდაციით გაწერეს. კარანტინის რეჟიმში რჩება 1 261 ადამიანი, სტაციონარში მეთვალყურებოსი ქვეშ — 216.

დაავადებათა კონტროლის ცენტრის დირექტორის განცხადებით, ამ ეტაპზე სიტუაცია კონტროლიდებადია, თუმცა, შესაძლოა, მომდევნო კვირას ინფექციის პირველწყარო ვეღარ დაადგინონ. ჯანდაცვის მინისტრის განმარტებით, ასეთ შემთხვევაში, შესაძლოა, დაავადებულთა რაოდენობა 80-100-მდე გაიზარდოს და პიკური მომდენტი დადგეს. ინფიცირების რისკის ზრდის შემთხვევაში, მთავრობა შეზღუდვების გამკაცრებას გეგმავს და კარანტინის გამოცხადებას არ გამორიცხავს.

რაც შეეხება მოქმედ შეზღუდვებს, ყველა მეზობელ ქვეყანასთან მოქალაქეთა მიმოსვლა შეზღუდულია, ასევე, 2 კვირით საზღვარი დაკეტილია უცხო ქვეყნების მოქალაქისთვის. ყველა სახელმწიფო და კერძო დაწესებულებას დისტანციურ რეჟიმში მუშაობის რეკომენდაცია აქვს მიცემული, მათ შორის, კაფე-ბარებსა და რესტორნებს. აკრძალულია სამარშრუტო ტაქსების გადაადგილება და სრულად შეზღუდულია სპორტ დარბაზებისა და სპა ცენტრების ფუნქციონირება. ასევე, 70 წელს ზევით მოქალაქეებს თვითიზოლაციაში დარჩენა ურჩიეს.

შეზღუდვები შეეხოთ ჟურნალისტებსაც, პარლამენტში მათ მხოლოდ კონკრეტული ლოკაციებიდან მუშაობის უფლება აქვთ, მთავრობის ბრიფინგებზე კი მათი დაშვება აიკრძალა. მედიები ბრიფინგის საერთო სიგნალს მიიღებენ და კითხვებს წინასწარ გაგზავნიან.

მთავრობის გადაწყვეტილებით, შსს აკონტროლებს უცხოეთიდან ჩამოსულ, იზოლაციაში მყოფ ყველა პირს და დარღვევის შემთხვევაში ისინი იძულებით კარანტინში გადაყავს. ამ ეტაპზე იძულებით კარანტინშია გადაყვანილი 99 ადამიანი. პარლაენტი განიხილავს, რომ თვითიზოლაციის წესების დარღვევა დასჯადი გახდეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: