დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

საქართველოს ჯანდაცვის მინისტრს, ეკატერინე ტიკარაძის თქმით, კორონავიუსის გავრცელებასთან ბრძოლაში მოხალისეების ჩართულობა სპეციალური ინსტრუქტაჟის გავლის გარეშე სარისკოა. ამ თემაზე მინისტრმა მთავრობის ადმინისტრაციაში ისაუბრა.

"ჩვენ, პირველ რიგში, ვიზრუნებთ, რომ მათ მიიღონ ინფორმაცია, როგორ უნდა იყოს მათი გადაადგილება უსაფრთხო, ხოლო ამის შემდეგ უკვე კონტროლირებადი იქნება რას გააკეთებენ ისინი და მიბმულები იქნებიან სპეციალურ რგოლებთან", — თქვა ეკატერინე ტიკარაძემ.

მოხალისეების თემასთან დაკავშირებით კითხვები მას შემდეგ გაჩნდა, რაც საზოგადოების სხვადასხვა ჯგუფებში პროცესში ჩართვის ინიციატივა გაჩნდა. ქართული ოცნების ახალგაზრდული ფრთის წევრები აცხადებენ, რომ თბილისის მერიას სასადილოების ბენეფიციარების მომსახურებაში დაეხმარებიან. ევროპული საქართველო კი ამბობს, რომ მზად არიან, 70 წელს გადაცილებულ, რისკ ჯგუფის ხანდაზმულებს საქართველოს მასშტაბით დახმარება გაუწიონ. მსგავსი ინიციატივა ბოლო დღეების განმავლობაში სხვა ჯგუფებმაც გამოთქვეს.

კორონავირუსისთან საბრძოლველად მოხალისეების ჩართულობაზე ისაუბრა დაავადებათა კონტროლის ეროვნული ცენტრის სამეცნიერო ხელმძღვანელმა, პაატა იმნაძემაც. მან აღნიშნა, მოხალისეობა კარგია, მაგრამ NCDC ამ ინსტიტუტს არ გამოიყენებს. იმნაძის განცხადებით, არაა აუცილებელი მოხალისეები დაავადებათა კონტროლის ცენტრმა გადაამზადოს.

"ჩვენ მოხალისეს ვერ გამოვიყენებთ ვერც ლაბორატორიაში, ვერც კონტაქტებს მოძიებაში, ვერც მათ მეთვალყურეობაში. ამიტომ მოხალისეების თემა დაავადება კონტროლის ცენტრის ფუნქციებს ამ შემთხვევაში საერთოდ სცდება. არის სპეციფიკური სამუშაოები, სადაც მოხალისეებს ვერ გამოვიყენებთ", — თქვა პაატა იმნაძემ.

ეპიდსიტუაცია საქართველოში: შეზღუდვები და რეკომენდაციები

18 მარტის მდგომარეობით, საქართველოში კორონავირუსი დაუდასტურდა 38 ადამიანს, მათ შორის 4 ბავშვია. ამასთან, დადასტურებულ შემთხვევებს შორის ერთი, N1 ინფიცირებული უკვე გამოჯანმრთელდა და ის საავადმყოფოდან 14-დღიანი თვითიზოლაციის რეკომენდაციით გაწერეს. კარანტინის რეჟიმში რჩება 1 261 ადამიანი, სტაციონარში მეთვალყურეობის ქვეშ — 216.

დაავადებათა კონტროლის ცენტრის დირექტორის განცხადებით, ამ ეტაპზე სიტუაცია კონტროლდება, თუმცა, შესაძლოა, მომდევნო კვირას ინფექციის პირველწყარო ვეღარ დაადგინონ. ჯანდაცვის მინისტრის განმარტებით, ასეთ შემთხვევაში, შესაძლოა, დაავადებულთა რაოდენობა 80-100-მდე გაიზარდოს და პიკური მომენტი დადგეს. ინფიცირების რისკის ზრდის შემთხვევაში, მთავრობა შეზღუდვების გამკაცრებას გეგმავს და კარანტინის გამოცხადებას არ გამორიცხავს.

რაც შეეხება მოქმედ შეზღუდვებს, ყველა მეზობელ ქვეყანასთან მოქალაქეთა მიმოსვლა შეზღუდულია, ასევე, 2 კვირით საზღვარი დაკეტილია უცხო ქვეყნების მოქალაქისთვის. ყველა სახელმწიფო და კერძო დაწესებულებას დისტანციურ რეჟიმში მუშაობის რეკომენდაცია აქვს მიცემული, მათ შორის, კაფე-ბარებსა და რესტორნებს. აკრძალულია სამარშრუტო ტაქსების გადაადგილება და სრულად შეზღუდულია სპორტ დარბაზებისა და სპა ცენტრების ფუნქციონირება. ასევე, 70 წელს ზევით მოქალაქეებს თვითიზოლაციაში დარჩენა ურჩიეს.

შეზღუდვები შეეხოთ ჟურნალისტებსაც, პარლამენტში მათ მხოლოდ კონკრეტული ლოკაციებიდან მუშაობის უფლება აქვთ, მთავრობის ბრიფინგებზე კი მათი დაშვება აიკრძალა. მედიები ბრიფინგის საერთო სიგნალს მიიღებენ და კითხვებს წინასწარ გაგზავნიან.

მთავრობის გადაწყვეტილებით, შსს აკონტროლებს უცხოეთიდან ჩამოსულ, იზოლაციაში მყოფ ყველა პირს და დარღვევის შემთხვევაში ისინი იძულებით კარანტინში გადაჰყავს. ამ ეტაპზე იძულებით კარანტინშია გადაყვანილი 99 ადამიანი. პარლამენტი განიხილავს, რომ თვითიზოლაციის წესების დარღვევა დასჯადი გახდეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: