პრემიერ-მინისტრის, გიორგი გახარიას განცხადებით, ქვეყანაში საგანგებო მდგომარეობის აუცილებლობა ისევ არ არსებობს, მაგრამ, შესაძლოა, დროთა განმავლობაში საჭირო გახდეს კარანტინის გამოცხადება. მისი თქმით, საჭიროების შემთხვევაში, ვირუსის პრევენციისთვის ამ ზომას მიმართავენ, რადგან აუცილებლობის გარეშე საგანგებო მდგომარეობის გამოცხადება ეკონომიკას დააზიანებს.

"რაღაც მომენტში შეიძლება მოგვიწიოს კარანტინული პირობების გამოცხადება და ამ მდგომარეობის დამძიმება, მაგრამ ეს არ ნიშნავს იმას, რომ აუცილებელია საგანგებო მდგომარეობის გამოცხადება და სრულად ინდივიდუალური უფლებების შეზღუდვა", — განაცხადა მან.

მისი თქმით, თუ მთავრობის თანამშრომლობა სამოქალაქო, ბიზნეს და კერძო სექტორთან იქნება ეფექტური, შეძლებენ იგივე ეფექტი მიიღონ ისე, რომ ნაკლები ზიანი მიაყენონონ ეკონომიკას, მოქალაქეთა ჯანმრთელობას და ქვეყანას.

"როგორც კი დავინახავთ, რომ სხვა გამოსავალი არა არის, საგანგებო მდგომარეობა კი არა, უფრო მკაცრ ზომებსაც მივიღებთ, იქედან გამომდინარე, რომ მთავრობის ძირითადი პრიორიტეტი არის ადამიანის ჯანმრთელობა", — განაცხადა მან.

ამავე თემაზე:

დღეს მთვრობამ ახალი შეზღუდვები და რეკომენდაციებიც გაავრცელა. პრემიერმა კი ხაზი გაუსვა, რომ მათი შესრულება სავალდებულოა.

გაიგეთ მეტი ახალ რეკომენდაციებზე:

პანდემია და რეკომენდაციები

17 მარტის მონაცემებით, საქართველოში კორონავირუსით ინფიცირების 34 შემთხვევაა დაფიქსირებული. ერთ ახალ შემთხვევაზე დღეს ინფექციური საავადმყოფოს დირექტორმა, მარინა ეზუგბაიამ განაცხადა.

34-დან ერთი, პირველი პაციენტი, რომელიც ირანიდან შემოვიდა გამოჯანმრთელდა და გუშინ საავადმყოფოდან გაწერეს. კარანტინში რჩება 1008 ადამიანი, სტაციონარში — 64.

მას შემდეგ, რაც ჯანდაცვის მსოფლიო ორგანიზაციამ COVID-19, იგივე კორონავირუსი, საერთაშორისო პანდემიად გამოაცხადა, საქართველოს მთავრობა და უწყებათაშორისი საკოორდინაციო საბჭო მუშაობის საგანგებო რეჟიმზე გადავიდა და შეზღუდვები და რეკომენდაციები გაავრცელა. ყველა მეზობელ ქვეყანასთან მოქალაქეთა მიმოსვლა შეზღუდულია, ასევე, 2 კვირით საზღვარი დაკეტილია უცხო ქვეყნების მოქალაქისთვის. ყველა სახელმწიფო და კერძო დაწესებულებას დისტანციურ რეჟიმში მუშაობის რეკომენდაცია აქვს მიცემული ისევე, როგორც კაფე-ბარებსა და რესტორნებს. ასევე, 70 წელს ზევით მოქალაქეებს თვითიზოლაციაში დარჩენა ურჩიეს.

მთავრობის გადაწყვეტილებით, შსს აკონტროლებს უცხოეთიდან ჩამოსულ, იზოლაციაში მყოფ ყველა პირს და დარღვევის შემთხვევაში ისინი იძულებით კარანტინში გადაყავს. ასევე, შეიქმნება სპეციალური მექანიზმი, რომელიც საკოორდინაციო საბჭოს გადაწყვეტილებების აღსრულებას შეამოწმებს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: