თბილისის საერთაშორისო კინოფესტივალის საპატიო სტუმარი მარგარეტე ფონ ტროტა იქნება

თბილისის მე-17 საერთაშორისო კინოფესტივალის სექციის "რეჟისორი ფოკუსში" საპატიო სტუმარი ცნობილი გერმანელი კინემატოგრაფისტი მარგარეტე ფონ ტროტა იქნება.

გერმანელი რეჟისორი, მსახიობი და სცენარისტი მარგარეტე ფონ ტროტა ახალი გერმანული კინოს ერთ-ერთ მთავარ ძალად მოიაზრება და მსოფლიოში ცნობილია, როგორც წამყვანი ფემინისტი კინოხელოვანი. სანამ ფონ ტროტა თავად შექმნიდა ნამუშევრებს, მონაწილეობდა გერმანელი რეჟისორების, რაინერ ვერნერ ფასბინდერისა და ფოლკერ შლონდორფის ფილმებში.

1975 წელს ეკრანებზე გამოვიდა მარგარეტესა და შლონდორფის ერთობლივი ნამუშევარი, ჰაინრიხ ბიოლის ნოველის მიხედვით გადაღებული "კატარინა ბლუმის შელახული ღირსება". ფილმმა, რომელიც დღემდე 1970-იანი წლების გერმანული კინემატოგრაფიის სახეა, რეჟისორებს საერთაშორისო აღიარება მოუტანა.

ფონ ტროტას პირველი დამოუკიდებელი ნამუშევარი "კრისტა კლაგესის მეორე გამოღვიძება" იყო. ფილმი ახალგაზრდა ქალის პოლიტიკურ რადიკალიზმზე კონცენტრირდება და მასში რამდენიმე მნიშვნელოვანი ასპექტია ხაზგასმული: ქალების გაერთიანება, დებს შორის ურთიერთობა, ძალადობის ზეგავლენა და შედეგები.

კარიერის მანძილზე ფონ ტროტა თავის ფილმებში შეეხო ისეთ თემებს, როგორებიცაა: აბორტი, კონტრაცეფცია, ქალების მდგომარეობა საჯარო სამსახურში, გენდერის ტრადიციული აღქმა და სხვა. მისი პერსონაჟი ქალები ძლიერი პროტაგონისტები არიან და თითქმის ყოველთვის რომელიმე პოლიტიკური იდეოლოგიის წინააღმდეგ იბრძვიან. თავად მარგარეტ ფონ ტროტაც თანატოლებთან ერთად აქტიურად იყო ჩართული გერმანიის 1960-იანი წლების მოვლენებში.

შეგახსენებთ, რომ თბილისის მე-17 საერთაშორისო კინოფესტივალის მთავარი თემა პოლიტიკა იქნება. სექციაში "Bios Politikos" (პოლიტიკური ცხოვრება) გაერთიანდება როგორც დოკუმენტური, ისე მხატვრული ფილმები მსოფლიოს სხვადასხვა ქვეყნებიდან. შერჩეული 10 ფილმი არსებულ გლობალურ თუ ლოკალურ დაძაბულობას, პოლიტიკური ცხოვრების ყოველდღიურობას, პოლიტიკის სხვა სფეროებთან გადაკვეთასა და სხვა მნიშვნელოვან საკითხებს ეხმიანება.