ინფრასტრუქტურის სამინისტროს ცნობით, ტყიბულში, ცხრაჯვარის სალოცავთან მისასვლელი გზისა და სამეგრელოში, ტობავარჩხილის ტბამდე მისასვლელი გზის რეაბილიტაცია იგეგმება. სამინისტროში აცხადებენ, რომ ორივე საგზაო ინფრასტრუქტურის პროექტი 14 თვის ვადაში დასრულდება.

სამინისტროს ცნობით, ცხრაჯვარის გზის პროექტი ითვალისწინებს სალოცავთან მისასვლელი 3,6 კმ-იანი საავტომობილო გზის რეაბილიტაციას. კერძოდ, იგეგმება ორფენიანი ასფალტის საფარის და გარე განათების მოწყობა, საავტომობილო გზის გასწვრივ ლითონის მილების ჩალაგება, რკინა-ბეტონის კიუვეტებისა და კედლების მშენებლობა. პროექტის თანახმად, სამშენებლო სამუშაოების ღირებულება 3 მლნ ლარია.

ტობავარჩხლის გზის რეაბილიტაციის პროექტის მიხედვით, იგეგმება გრუნტის საფარისა და ლითონის თვალამრიდების მოწყობა. გზის სიგრძე დაახლოებით 10 კმ-ია, სავალი ნაწილის სიგანე კი 6,5 მეტრი. სამშენებლო სამუშაოების ღირებულება, 13 მლნ ლარამდეა. აქედან, წელს, საორიენტაციოდ, 4 მლნ ლარის სამუშაო შესრულდება.