დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

საქართველოში კორონავირუსის მე-10 შემთხვევა დადასტურდა. პაციენტი, რომელსაც კორონავირუსი დაუდგინდა დაავადებათა კონტროლის ეროვნული ცენტრის დირექტორის, ამირან გამყრელიძის შვილია. ნიკოლოზ გამყრელიძემ ვირუსის დადასტურების შესახებ, თავის Facebook-ზე დაწერა და ინფექციურ საავადმყოფოს ინფორმაციის გასაჯაროების უფლება მისცა.

"მიმაჩნია რომ ავადმყოფობა სირცხვილი არ არის. არ მინდა ეს საკითხი გახდეს სხვადასხვა ინტერპრეტაციის საგანი და, რაც მთავარია, არ გახდეს ეს დამატებითი პანიკის წყარო. დარწმუნებული ვარ, რომ თუ ვიქნებით მეტად სოლიდარულები და ყველა გავითავისებთ მეტად ჩვენს სამოქალაქო პასუხისმგებლობას, ძალიან მალე დავძლევთ ჩვენს ქვეყანაში ამ გამოწვევას", — წერს ნიკა გამყრელიძე.

ინფექციური საავადმყოფოს დირექტოირს, მარინა ეზუგბაიას თქმით, მიმდინარეობს იტალიიდან დაბრუნებულ ჯგუფთან კონტაქტირებული პირების კვლევა. ინფექციურში მოთავსებული 10 პაციენტიდან მხოლოდ ერთის მდგომარეობაა საშუალოზე მძიმე, თუმცა დირექტორის თქმით, ისიც სტაბილურია.

"ეს არის ერთ-ერთი კონტაქტი, რომელიც ჩვენს ცენტრში, როგორც დადასტურებული ისე შემოვიდა. გუშინ დადასტურდა კონტაქტების კვლევის შედეგების მიხედვით. მეოთხე დადასტურებული შემთხვევის ჯგუფიდან ერთ-ერთია", — თქვა მარინა ეზუგბაიამ.

ამ ეტაპზე საქართველოში კორონავირუსით ინფიცირების 10 შემთხვევაა დადასტურებული. პირველი 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე — 29 თებერვალს, მეოთხე — 5 მარტს დილით, დანარჩენი 5 კი ამავე დღეს საღამოს. ამასთანავე, 4 მარტს კორონავირუსი დაუდგინდა იტალიაში მცხოვრებ საქართველოს მოქალაქეს. დღეს, 7 მარტს კორონავირუსისი ინფიცირების კიდევ 3 შემთხვევა დადასტურდა.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: