დისნეი აგრძელებს თავისი საკულტო ანიმაციების მიხედვით ფილმების გადაღებას. მათ შორის ერთ-ერთი მომავალი პროექტი კონკიაა, რომელშიც მთავარი გმირის, კონკიას როლს კუბელი მომღერალი, კამილა კაბელო შეასრულებს.

კიდევ ერთი მნიშვნელოვანი პერსონაჟის, ჯადოქარი ნათლიის როლს კი მსახიობი ბილი პორტერი მოირგებს.

დიახ, ყველასათვის კარგად ნაცნობი ამ კეთილი ჯადოქრის.

რამდენიმე დღის წინ CBS News-თან მიცემულ ინტერვიუში 50 წლის მსახიობმა, რომელსაც მაყურებლების დიდი ნაწილი სერიალ Pose-ში შესრულებული როლით იცნობს, თავის მომავალ როლზე ისაუბრა:

"გასულ კვირას გადაღებებზე ვიყავი, როცა გავაცნობიერე, რამდენად შორსმჭვრეტელური გადაწყვეტილებაა, რომ ჯადოქარი ნათლიის როლს მე შევასრულებ. ჯადოქრობას გენდერი არ აქვს და ამ პერსონაჟსაც მომავალ ფილმში რომელიმე გენდერული იდენტობის გარეშე წარმოვაჩენთ".

ბილი პორტერი რეალურ ცხოვრებაშიც ხშირად ცდილობს, რომ გენდერულ სტერეოტიპებს შეებრძოლოს და თუნდაც თავისი ჩაცმულობით რომელიმე ერთ კონკრეტულ გენდერულ როლს არ მოერგოს.

ბილი პორტერი ოსკარების 91-ე დაჯილდოების წითელ ხალიჩაზე.

ფოტო: Richard Shotwell

მსახიობის განცხადებით, ის არ ღელავს ამ ფაქტის გამო მაყურებლების შესაძლო უარყოფით გამოხმაურებაზე:

"ეს იქნება კლასიკური ზღაპარი ახალი თაობისთვის. ვფიქრობ, რომ ახალი თაობა ამისთვის უკვე მზადაა. ბავშვები მართლა მზად არიან, რომ მიიღონ ეს".

კონკიას ახალი ფილმის რეჟისორი კეი ქენონი იქნება, ფილმის პრემიერა კი მომავალი წლის 5 თებერვალსაა დაგეგმილი და ჩვენც მაშინ შეგვეძლება ახალი ჯადოქარი ნათლია შევაფასოთ.