სომხეთის პრემიერ-მინისტრი ნიკოლ პაშინიანი 3 მარტს თბილისში სომხურ დიასპორას შეხვდა და მათ კითხვებს პასუხობდა. აღნიშნულ შეხვედრაზე ერთ-ერთ კითხვაზე საპასუხოდ პაშინიანმა განაცხადა, რომ "საქართველოში მცხოვრებმა სომხებმა უნდა იამაყონ, რომ საქართველოს მოქალაქეები არიან". კითხვა-პასუხის თარგმანს რადიო თავისუფლება ავრცელებს.

რუსთაველის თეატრში შეხვედრისას მაგისტრატურის სტუდენტმა, ერიკ კარაპეტიანმა ნიკოლ პაშინიანს ჰკითხა, აქვს თუ არა სომხეთს რაიმე სახელმწიფო პროგრამა, რომლითაც ეთნიკურად სომხები სამშობლოში დაბრუნდებოდნენ.

პაშინიანის პასუხი:

"როდესაც მე ვხვდები ხოლმე, მაგალითად, გერმანიაში მცხოვრებ სომხებს და როცა მეკითხებიან სომხეთში დაბრუნებაზე, ეს ჩემთვის გასაგები თემაა… მაგრამ თბილისში, საქართველოში მცხოვრები სომხების მხრიდან მსგავსი შეკითხვა რაღაც კითხვებს მიჩენს. რადგან მე ვთვლი, რომ თბილისში მცხოვრები სომხები სამშობლოში ცხოვრობენ.

და ამით მე მინდა ვთქვა, რომ, დიახ, თბილისში მცხოვრებმა სომხებმა და მთლიანად საქართველოში მცხოვრებმა სომხებმა უნდა იამაყონ, რომ საქართველოს მოქალაქეები არიან.

ეს ძალიან მნიშვნელოვანი ამბავია. ჩვენ სომხებმა, როგორც ხალხმა, მიზანმიმართულად უნდა ვიმოქმედოთ იმისთვის, რომ საქართველო იყოს ძლიერი, განვითარებული, სტაბილური და ძლევამოსილი. და საქართველომაც მიზანმიმართულად უნდა იმოქმედოს, რომ სომხეთი იყოს ძლიერი, განვითარებული და სტაბილური სახელმწიფო".

სომხეთის პრემიერ-მინისტრი, ნიკოლ პაშიანიანი თბილისს 3 მარტს ეწვია. ვიზიტის ფარგლებში ის საქართველოს პრემიერ-მინისტრს, პრეზიდენტსა და პარლამენტის თავმჯდომარეს შეხვდა. ასევე, გვირგვინით შეამკო გმირთა მემორიალი. პაშინიანის ვიზიტი დღეს სრულდება.

ამავე თემაზე: