საქართველოს პრემიერ-მინისტრმა, გიორგი გახარიამ საქართველოში ოფიციალური ვიზიტით მყოფ სომხეთის პრემიერ-მინისტრს, ნიკოლ პაშინიანს, კავკასიური ჯიშის ძაღლი, კერძოდ ყაზბეგური ბომბორა აჩუქა. საჩუქრის გადაცემის ვიდეო პაშინიანმა საკუთარ ფეისბუქგვერდზე გამოაქვეყნა.

ვიდეოში ისმის, როგორ უხსნის გახარია პაშინიანს რუსულ ენაზე, რომ ძაღლი სუფთა სისხლისაა და ყაზბეგიდან ჩამოიყვანეს. "ნახე, როგორი ღირსეულია და მშვიდია", — ამბობს ის ძაღლზე.

სომხეთის პრემიერი დაინტერესდა აქვს თუ არა ძაღლს სახელი. გახარიამ უპასუხა, რომ ძაღლს ბომბორა ჰქვია, მაგრამ მას სურვილის შემთხვევაში სახელის შეცვლა შესთვაზა. თუმცა, პაშინიანმა გადაწყვიტა, რომ ძაღლს ბომბორა ერქმევა. მისი თქმით, ეს მეხუთე ძაღლია, რომელიც სახლში ეყოლება.

მოგვიანებით პაშინიანმა ფეისბუქზე ბომბორასთან და გახარიასთან ერთად სელფიც გამოაქვეყნა.

სომხეთის პრემიერ-მინისტრი, ნიკოლ პაშიანიანი თბილისს დღეს, 3 მარტს ეწვია. ვიზიტის ფარგლებში ის საქართველოს პრემიერ-მინისტრს, პრეზიდენტსა და პარლამენტის თავმჯდომარეს შეხვდა. ასევე, გვირგვინით შეამკო გმირთა მემორიალი.

ოფიციალური ვიზიტების შემდეგ, როგორც ჩანს, პაშინიანი არაოფიციალურ ვახშამზე მიიწვიეს. ვიდეოში ჩანს, რომ შეხვედრას მინისტრთა კაბინეტის წევრები და ქართული ოცნების წარმომადგენლები ესწრებოდნენ.