საქართველოს პრეზიდენტმა, სალომე ზურაბიშვილმა პარლამენტისთვის ყოველწლიური მოხსენების წარდგენისას ადამიანურ ღირებულებებზე ისაუბრა. მისი თქმით, საზოგადოება ბოლო დროს უმადურობასა და თვითგვემაში ჩაიკარგა, ამიტომ ვერ აფასებს, რამდენ წარმატებას მიაღწია საქართველომ ბოლო ათწლეულში.

მისი თქმით, 30 წლის წინ, როცა დამოუკიდებლობას ვზეიმობდით, ქვეყანაში ვერავინ იფიქრებდა, რომ საქართველო ევროკავშირთან თავისუფალ მიმოსვლასა და ვაჭრობას მიაღწევდა და გახდებოდა ნატოსთვის ერთ-ერთი ყველაზე სანდო პარტნიორი. მან მიმოიხილა სხვადასხვა პროექტები და ხელშეკრულებები, რომლებიც საქართველოს საგარეო პარტნიორებთანა აქვს გაფორმებული.

პრეზიდენტმა ასევე აღნიშნა, რომ საზოგადოება ერთგვარ დეპრესიაშია რისი მიზეზიც "საკუთარ თავში ჩაძირვაა". მისივე თქმით, დღეს უარყოფილია ღირებულებები, რომლებიც "ქართული კულტურის წიაღიდან, ქრისტიანობიდან და რუსთაველიდანაა ამოზრდილი".

"აგრესიამ, სიძულვილმა, შეურაცხყოფამ შეცვალა ქართულ ღირებულებათა სისტემა. მივიღეთ აგრესია შემწყნარებლობის ნაცვლად, სიძულვილი სიყვარულის ნაცვლად, შეურაცხყოფა ზრდილობის ნაცვლად, ეგოიზმი და კარჩაკეტილობა სოლიდარობის ნაცვლად, შიში ტრადიციული სიმამაცის ნაცვლად", — განაცხადა მან.

საქართველოს პრეზიდენტი სალომე ზურაბიშვილი დღეს, 4 მარტს პარლამენტის წინაშე ყოველწლიური მოხსენებით წარსდგა. ოპოზიცია, რომელიც ბოიკოტის რეჟიმშია პრეზიდენტის გამოსვლას არ ესწრებოდა. ზურაბიშვილს ბოიკოტი გამოუცხადა ფრაქცია დამოუკიდებელმა დეპუტატებმაც.

გაიგეთ მეტი პრეზიდენტის პარლამენტში გამოსვლაზე: