როგორც უკვე ვიცით, წელს დისნეი კიდევ ერთი საკულტო ანიმაციის კინოვერსიას უშვებს, რომლის პროდიუსერმაც ცოტა ხნის წინ განაცხადა, რომ ამ ახალ ვერსიაში მაყურებლებისთვის კარგად ნაცნობ პერსონაჟს, მეთაურ ლი შანგს ვერ ვიხილავთ, რადგან მისი ისტორია #MeToo მოძრაობის ერას "არ შეესაბამება".

მულანის ფილმი ანიმაციის მსგავსად ჩინეთის იმპერიაში მცხოვრები ქალის შესახებ მოგვითხრობს, რომელიც კაცად ინიღბება, რათა სამხედრო არმიაში მონაწილეობა შეძლოს.

1998 წელს შექმნილი ორიგინალი ანიმაცია ჩინური ლეგენდის შესახებ მოგვითხრობს, სადაც გენერალ ლი შანგის პერსონაჟს მულანის კაცი ჯარისკაცის ერთგვარ ალტერ ეგოსთან ახლო ურთიერთობა უყალიბდება, ხოლო მას შემდეგ, რაც მულანის ნამდვილ იდენტობას გაიგებს, მცირეხნიანი გაბრაზების მიუხედავად, სიყვარულში გამოუტყდება.

სულ ცოტა ხნის წინ მიცემულ ინტერვიუში პროდიუსერმა ჯეისონ რიდმა დაადასტურა, რომ ფილმში ისტორიის მსგავსად განვითარებას ვერ ვიხილავთ:

"ვფიქრობ, #MeToo მოძრაობის ეპოქაში ისეთი პერსონაჟი, რომელიც მმართველი ოფიცერია და ამავდროულად სასიყვარულო ინტერესს იჩენს მისი ქვეშევრდომის მიმართ, უხერხულობას იწვევს და მიგვაჩნია, რომ ის თანამედროვე ტენდენციებს არ შეეფერება".

მისი თქმით, ფილმში სრულიად განსხვავებულ ისტორიას ვიხილავთ:

"ჩვენ ლი შანგის გმირი ორ პერსონაჟად გავყეთ: ერთი მეთაური ტუნგი იქნება, რომელიც მამისა და აღმზრდელის დატვირთვას შეიძენს, ხოლო მეორე მულანის თანასწორი ჯარისკაცი, ჰონგუი".

აღსანიშნავია, რომ ეს ერთადერთი ცვლილება არ არის, რომელსაც მომავალ ფილმში უნდა ველოდოთ: რეჟისორმა დაადასტურა, რომ ანიმაციიდან ყველასთვის კარგად ნაცნობი სიმღერის სცენები ახალ ფილმში არ იქნება.

ასევე ამ ანიმაციის ერთგული გულშემატკივრებისთვის ყველაზე მოულოდნელი და სამწუხარო სიახლეა ისიც, რომ ფილმში ვერ ვიხილავთ ყველასთვის საყვარელ პერსონაჟს, დრაკონ მუშუს.

ფილმის პრემიერა სულ მალე, 27 მარტსაა დაგეგმილი და სწორედ მაშინ შეგვეძლება თავად შევაფასოთ, თუ როგორ იმოქმედა ამ ცვლილებებმა ცნობილი ჩინური ლეგენდის ახალ ეკრანიზაციაზე.