რამდენიმეთვიანი სპეკულაციის შემდეგ, მულანის ფილმის რეჟისორმა განაცხადა, რომ დიდ ეკრანზე მუშუს ვერ ვიხილავთ. მუშუ წითელი დრაკონია, რომელიც ჰუა მულანის მფარველი ანგელოზის როლს ირგებს და გოგონას არმიაში მოსახვედრად ეხმარება.

ორიგინალ ვერსიაში, ყველასთვის საყვარელ წითელ დრაკონს, ედი მერფი ახმოვანებს.

ფილმის ტრეილერი პირველად დეკემბერში გამოვიდა და ფანებმა მაშინვე შეამჩნიეს რომ მუშუ არსად ჩანდა. ამასთან დაკავშირებით, ბევრ მაყურებელს კითხვები გაუჩნდა. რამდენიმე დღის წინ კი, ფილმის რეჟისორმა ქალმა, ნიკი კარომ Digital Spy-თან ინტერვიუში თქვა, რომ მუშუ ფილმში საერთოდ არ იქნება.

ტრეილერში ნაჩვენები ფენიქსი ბევრი ფანის აზრით სწორედაც რომ მუშუა, მაგრამ რეჟისორმა ჭორები სწრაფად უარყო. მისი თქმით, დრაკონი კაცური ენერგიის განსახიერებაა, ხოლო ფენიქსი კი — ქალური. კაროს თქმით, ფილმისთვის, რომელიც გენდერულ როლებზე დიდ აქცენტს აკეთებს, ფენიქსი უფრო შესაფერისია.

"ყველა ვთანხმდებით რომ მუშუს შეცვლა შეუძლებელია. ფილმში სხვა ქმნილებები იქნებიან და მათ წინაპრებთან ექნებათ უფრო მჭიდრო კავშირი, ასევე უფრო მეტი დრო დაეთმობა მულანის და მამისის ურთიერთობას, მაგრამ განახლებული მუშუ? ეს არ იქნება სწორი".

გაბრაზებულ ფანებს რეჟისორი ეუბნება, რომ შეუძლიათ არ იდარდონ, რადგან ბევრი ცნობილი სცენა მაქსიმალური სიზუსტით იქნება გაცოცხლებული, მათ შორის მაჭანკალის სცენები.

ეს პირველი ცვლილება არ არის — რამდენიმე კვირის წინ ნიკი კარომ ასევე თქვა, რომ ფილმში ანიმაციიდან ცნობილი სიმღერები არ იქნება. მულანი კინოთეატრებში 27 მარტს გავა.