როგორც უკვე ვიცით, დისნეი წელს კიდევ ერთი საკულტო ანიმაციის, მულანის რიმეიქს გამოუშვებს, რომელიც 2020 წლის უდავოდ ერთ-ერთი ყველაზე მნიშვნელოვანი კინომოვლენა იქნება.

საოცრად საინტერესო სიუჟეტებისა და შთამბეჭდავი ვიზუალური დეტალების გვერდით დისნეის ანიმაციების ხსენებისას ერთგულ მაყურებლებს მაშინვე ახსენდებათ მუსიკალური ნომრები, რომელიც ყოველ ანიმაციას განსაკუთრებულ ხიბლს მატებს.

ამ მხრივ გამონაკლისი არც მულანია და 1998 წელს შექმნილი ანიმაციიდან არაერთი მუსიკალური ეპიზოდი გვახსოვს, თუმცა ამ მხრივ, როგორც ჩანს, მომავალ ფილმში სიურპრიზებს უნდა ველოდოთ.

ცოტა ხნის წინ ფილმის რეჟისორმა, ნიკი კარომ საჯარო შეხვედრისას თავისი ნამუშევრის შესახებ ისაუბრა და მათ შორის ერთი უჩვეულო დეტალიც გაამხილა: ანიმაციიდან ყველასთვის კარგად ნაცნობი სიმღერის სცენები ახალ ფილმში არ იქნება.

"ანიმაციის საწინააღმდეგო არაფერი მაქვს, რადგან მისი სიმღერები მართლაც შთამბეჭდავია და რომ შემეძლოს, მათ ფილმშიც გამოვიყენებდი. ეს არ ნიშნავს იმას, რომ მუსიკას მთლიანად უგულებელვყოფთ, პირიქით — ანიმაციისთვის დამახასიათებელ მოლიდიურობას ძალიან საპატიო და მნიშვნელოვანი გზით გამოვიყენებთ, ამჟამად მხოლოდ ამის თქმა შემიძლია", — განაცხადა რეჟისორმა.

ეს კი იმას ნიშნავს, რომ ახალ ფილმში ფანების ისეთ საყვარელ სიმღერებს, როგორებიცაა I'll Make a Man Out of You და Reflection, ჩვენთვის კარგად ნაცნობი პერსონაჟები აღარ შეასრულებენ.

ცნობილ სიმღერებთან ერთად მულანის რიმეიქში ასევე ვერ ვიხილავთ ყველასთვის საყვარელ ანიმაციურ პერსონაჟს, დრაკონ მუშუს.

ამ ყველაფრის მიუხედავად, აღსანიშნავია ისიც, რომ ბევრი დეტალი ანიმაციიდან იდენტურად იქნება გაცოცხლებული ფილმში.

ფოტო: Disney

ფოტო: Disney

შესაბამისად, ისღა დაგვრჩენია, მოუთმენლად დაველოდოთ ფილმის პრემიერის თარიღს - 27 მარტს და ისე შევაფასოთ დისნეის ახალი ამბიციური პროექტი.

ასევე იხილეთ: