ბოლო წლებში მარველის კომიქსების მიხედვით გადაღებულ ბლოკბასტერებში შესრულებული ჰალკის როლით ცნობილი ამერიკელი მსახიობი, მარკ რუფალო მილიონობით მაყურებელმა შეიყვარა, თუმცა, როგორც ჩანს, მსახიობმა გადაწყვიტა, უფრო რთულ და სერიოზულ როლებს შესჭიდებოდა, ვიდრე გიგანტური მწვანე კაცია.

HBO-მ სულ ცოტა ხნის წინ გამოაქვეყნა ახალი სერიალის I Know This Much Is True ტრეილერი, რომელშიც მარკ რუფალო მთავარ, მეტიც — ორ მთავარ როლს ასრულებს ერთდროულად.

ახალი სატელევიზიო შოუ ამერიკელი მწერლის, უოლი ლემბის ამავე სახელწოდების მქონე ბესტსელერის მიხედვით გადაიღეს, რომელიც 1998 წელს გამოქვეყნდა. წიგნი და სერიალიც იდენტური ტყუპი ძმების შესახებ მოგვითხრობს, რომელთაგან ერთ-ერთიც შიზოფრენიით იტანჯება.

სერიალის ოფიციალურ სინოფსისში ვკითხულობთ: "შოუ იდენტური ტყუპი ძმების, დომინიკისა და თომას ბირდსეის ოჯახური საგის შესახებ მოგვითხრობს, რომელიც მათი პარალელური ცხოვრების ხაზებითაა აგებული — ორი ძმის ღალატით, მსხვერპლშეწირვითა და პატიებით სავსე ისტორიებით".

სერიალის სცენარის ავტორი და რეჟისორი დერეკ ჩანფრენსია, რომელსაც მანამდე გადაუღია ისეთი ცნობილი ფილმები, როგორებიცაა Blue Valentine (2010) და The Light Between Oceans (2016).

ახალი სატელევიზიო შოუს პრემიერა 27 აპრილს შედგება და ჩვენც სწორედ მაშინ შეგვეძლება მარკ რუფალოს სამსახიობო ოსტატობის საკმაოდ რთული გამოცდის შეფასება.