ოპოზიციური პარტიები, ევროპული საქართველო და ნაციონალური მოძრაობა მიმდინარე სასესიო კვირაში ბოიკოტს აგრძელებს. 2 მარტის ბიუროს სხდომაზე შესაბამისი ინფორმაცია პარლამენტის თავმჯდომარემ, არჩილ თალაკვაძემ გააჟღერა. მისივე თქმით, 4 მარტს საქართველოს პრეზიდენტი, სალომე ზურაბიშვილი პარლამენტს წლიურ ანგარიშს წარუდგენს.

პარტიებში აცხადებენ, რომ მანამ, სანამ მათი მოთხოვნა საარჩევნო სისტემაზე, არ დაკმაყოფილდება. მათ ბოიკოტი პროპორციულ საარჩევნო სისტემაზე კანონპროექტის ჩაგდების შემდეგ გამოაცხადეს.

პროპორციულის ჩავარდნა, პროტესტი და პოლიტიკური დაპირისპირება — მოკლედ

მას შემდეგ, რაც ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გააერთიადნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციებმა მაჟორიტარი დეპუტატებისა და ოცნების ოფისთან გადაინაცვლა, სადაც აქტივისტებს მმართველი გუნდის მხარდამჭერები ხვდებოდნენ და ფიზიკურად უსწორდებოდნენ. გარდა ამისა, განახლდა საპროტესტო მოძრაობა "არა ნაცებს" და გაიმართა აქციები სახელად "დემიშიზაცია", რომელთა წევრები ნაციონალური მოძრაობის ოფისებს კვერცხებს და ცოცხებს ესროდნენ, მხარდამჭერებსა და აქტივისტებს კი ფიზიკურად უსწორდებოდნენ.