სატელევიზიო ინდუსტრიაში ერთ-ერთი ყველაზე ცნობილი და გახმაურებული სერიალის, სოპრანოს კლანის გამოსვლიდან 21 წელი გავიდა. ამ შოუსა და პოდკასტების მოყვარულებს კი განსაკუთრებული სიახლე ელით:

მაიკლ იმპერიოლი, რომელიც სერიალში კრისტოფერ მოლტისანის როლს ასრულებდა, და სტივ შირიპა, რომელიც ამავე სერიალში ბობი ბაკალიერს განასახიერებს, 1999 წელს გამოსული შოუს შესახებ ახალ პოდკასტში ისაუბრებენ.

სტივ შირიპა და მაიკლ იმპერიოლი.

ფოტო: WireImage

Talking Sopranos — ასე ერქმევა პოდკასტს, რომელშიც HBO-ს საკულტო სერიალს თითოეული ეპიზოდის მიხედვით ცალ-ცალკე განიხილავენ.

აღსანიშნავია, რომ პოდკასტში შოუს მსახიობები კადრს მიღმა გადასაღებ მოედანზე მომხდარ აქამდე უცნობ ამბებსა და ფაქტებზეც ისაუბრებენ. ასევე ამ პროექტის ფარგლებში მოვისმენთ ახალ ინტერვიუებს შოუს მსახიობებთან, სცენარის ავტორებთან თუ სხვა განსაკუთრებულ სტუმრებთან.

პოდკასტის სულ რამდენიმე დღის წინ გამოქვეყნებულ ტიზერში მაიკლ იმპერიოლი ამბობს, რომ "შოუს ეკრანებზე გამოსვლის შემდეგ ის აღარ უნახავს", რაც იმას ნიშნავს, რომ მსახიობებთან ერთად სერიალის ერთგულ გულშემატკივრებსაც ეძლევათ შესაძლებლობა, რომ ეს სატელევიზიო შოუ ერთგვარად ხელახლა აღმოაჩინონ.

სოპრანოს კლანი 1999 წლიდან 2007 წლამდე გადიოდა და 6 სეზონის განმავლობაში სულ 86 ეპიზოდი შეიკრა, რაც იმას ნიშნავს, რომ მაიკლ იმპერიოლსა და სტივ შირიპას ბევრი რამ აქვთ განსახილველი მომავალი მსმენელებისათვის.