თურქეთის მოთხოვნით, სირიაში, იდლიბის პროვინციაში მიმდინარე მოვლენების გამო ჩრდილოატლანტიკური ალიანსის საბჭო დღეს, 28 თებერვალს შეიკრიბება. ამის შესახებ ინფორმაცია ალიანსის ოფიციალურ გვერდზე გავრცელდა.

როგორც მათ მიერ გავრცელებულ ინფორმაციაში ვკითხულობთ, ალიანსის 29 წევრი ქვეყნის ელჩები შეიკრიბებიან და ნატოს ხელშეკრულების მე-4 მუხლის შესაბამისად სირიაში არსებული ვითარების გამო კონსულტაციებს გამართავენ.

ნატოს ხელშეკრულების მე-4 მუხლის თანახმად, ალიანსის ნებისმიერ წევრს შეუძლია მოითხოვოს მოკავშირეებთან კონსულტაციები, როდესაც თვლის, რომ მისი ქვეყნის ტერიტორიულ მთლიანობას, პოლიტიკურ დამოუკიდებლობასა და უსაფრთხოებას საფრთხე ემუქრება.

სირიის ჩრდილო-დასავლეთში, იდლიბის პროვინციაში მომხდარი საჰაერო თავდასხმის შედეგად მინიმუმ 33 თურქი ჯარისკაცი დაიღუპა და 30-ზე მეტი დაშავდა. ამის შესახებ ინფორმაციას საერთაშორისო მედია ავრცელებს. სხვა წყაროებით ვრცელდება ინფორმაცია, რომ დაშავებულების რაოდენობა უფრო მეტია.

თურქეთის ოფიციალური პირების განცხადებით, თავდასხმა სირიის სამთავრობო ძალებმა განახორციელეს. მათივე თქმით, რუსული რეაქტიული თვითმფრინავები წინა კვირის განმავლობაში ამ რეგიონში მიმდინარე თავდასხმებში იყვნენ ჩართულნი.

თურქული მედიის ინფორმაციით, პრეზიდენტმა რეჯეპ ტაიპ ერდოღანმა ხუთშაბათს ღამით ანკარაში საგანგებო შეხვედრა გამართა. შეხვედრის შემდეგ თურქეთის ძალები სირიის წინააღმდეგ დაპირისპირებაში ჩაერთვნენ.