გამარჯობა, შენ იმყოფები ჩრდილოეთ სენტინელის კუნძულზე და ჩვენ შენი დანახვა არ გვიხარია! საუკეთესო შემთხვევაში სწორედ ასე შეგხვდებიან კუნძულზე, რომელიც ინდოეთის ოკეანეში მდებარეობს და ოფიციალურად ინდოეთს ეკუთვნის.

როგორც მიხვდით, იქ მაცხოვრებლებს სტუმრები მაინცდამაინც არ უყვართ. მეტიც, აქ მოხვედრა შეიძლება სიცოცხლის ფასადაც კი დაგიჯდეთ. მაგალითად, სხვადასხვა დროს ვრცელდებოდა ინფორმაცია იმის შესახებ, რომ კუნძულს მიახლოებული ორი მეთევზე, რომლებიც შტორმისგან თავის დაღწევას ცდილობდნენ, აბორიგენების ისრებს ემსხვერპლნენ.

ფოტო: Jimmy Nelson

კუნძულის ბინადრების ენა არ ჰგავს არც ერთ სხვა ენას. კუნძულს, სხვადასხვა დროს, რამდენიმე ექსპედიცია და მოგზაური ეწვია, თუმცა ეს ვიზიტები მშვიდობიანად არ დასრულებულა და სტუმრები იძულებულები იყვნენ კუნძული დაეტოვებინათ.

კარგი ამბავი ის არის, რომ აბორიგენების გულის მოგებას საკვებითა და საჩუქრებით შეძლებთ. 1991 წელს ინდოელმა მეცნიერებმა მათთან კონტაქტის დამყარება შეძლეს და წითელი პლასტმასის ქილებიც კი უსახსოვრეს, რამაც კუნძულის მცხოვრებლების დიდი მოწონება დაიმსახურა. თუმცა ეს აღფრთოვანება ზუსტად იმდენ ხანს გაგრძელდა, რა დროც ნაპირიდან ძღვენის მოგროვებასა და სახლებისკენ გაზიდვას სჭირდებოდა.

ფოტო: Christian Caron

კუნძულ ჩრდილოეთ სენტინელის ფართობი სულ რაღაც 72 კმ.2-ა. მოსახლეობის ძირითადი საქმიანობა თევზაობა და ზღვის კუების დაჭერაა, ნადირობენ გარეულ ღორებზეც, იარაღად კი მშვილდ-ისარსა და ჰარპუნს იყენებენ. საინტერესოა ისიც, რომ ამ ადამიანებს არ ჰყავთ ბელადი და არ გააჩნიათ კერძო საკუთრების გაგება.