პარლამენტის ყოფილი თავმჯდომარე და უმრავლესობის წევრი, ირაკლი კობახიძე უარყოფს ინფორმაციას, რომ ევროკავშირის ელჩის რეზიდენციაში შეხვედრისას ოპოზიციას საპარლამენტო მანდატების 110/40-ზე თანაფარდობით გადანაწილება შესთავაზა. ამის შესახებ კობახიძემ ევროკავშირის ელჩის რეზიდენციის დატოვებისას განაცხადა.

მისი თქმით, დღევანდელი შეხვედრა მოლაპარეკების ფორმატის არ ყოფილა და შესაბამისად, არც შეთავაზებები გაჟღერებულა.

"დღეს გვქონდა დიპლომატების მიერ ორგანიზებული საუზმე და მათ ამისთვის რა თქმა უნდა, მადლობა უნდა გადავუხადოთ. ბუნებრივია, განვიხილეთ სხვადასხვა საკითხი, რომელიც დაკავშირებულია პოლიტიკურ პროცესებთან და განვიხილეთ ყველა აქტუალური საკითხი. საარჩევნო სისტემასთან დაკავშირებით დაისვა კითხვები. ბუნებრივია, ამაზეც იყო დისკუსია. ჩვენ თითქოს შევთავაზეთ ოპოზიციას 110/40-ზე, როგორც ასეთი ეს ინფორმაცია არის არასწორი", — განაცხადა კობახიძემ.

პარტია ახალი საქართველოს ლიდერის, გიორგი ვაშაძის თქმით, ქართულმა ოცნებამ ოპოზიციას მანდატების ახალი გადანაწილება შესთავაზა, რაც 110 პროპორციულ და 40 მაჟორიტარულ მანდატს გულისხმობს. ამის შესახებ ვაშაძემ, ევროკავშირის ელჩის, კარლ ჰარცელის რეზიდენციაში მიმდინარე შეხვედრიდან გამოსვლის შემდეგ განაცხადა. როგორც ვაშაძემ თქვა, ახალი შეთავაზება უმრავლესობის წევრმა, ირაკლი კობახიძემ გააჟღერა.

დღეს, 27 თებერვალს ევროკავშირის ელჩის, კარკლ ჰარცელის რეზიდენციაში უმრავლესობისა და ოპოზიციის წევრების შეხვედრა გაიმართა. შეხვედრის მიზანია, რომ მხარეებმა მოლაპარაკებების ფანჯრის დახურვამდე, რომელიც თებერვლის ბოლოს იხურება, საარჩევნო სისტემასთან დაკავშირებით მოლაპარაკებას მიაღწიონ.

ოპოზიციის ლიდერის დაკავება და შეწყვეტილი დიალოგი

მას შემდეგ, რაც ბიძინა ივანიშვილმა დაპირება არ შეასრულა და 2020 წლის საპარლამენტო არჩევნებისთვის პროპორციულ საარჩევნო სისტემაზე გადასვლას უმრავლესობის წევრებმა მხარი არ დაუჭირეს, ოპოზიციასა და მმართველ გუნდს შორის დიპლომატების მედიატორობით დაიწყო. სადაც მმართველმა გუნდი ოპოზიციას პროპორციული მანდატების 100-მდე გაზრდას და მაჟორიტარულის 50-მდე შემცირებას სთავაზობდა.

ოპოზიციასა და ხელისუფლებას შორის დიპლომატების ორგანიზებული მოლაპარაკებები ოპოზიციონერ გიგი უგულავას დაკავების შემდეგ ჩაიშალა. თბილისის ყოფილ მერსა და ოპოზიციის ერთ-ერთ ლიდერს პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".