ჯანდაცვის მინისტრი, ეკატერინე ტიკარაძე აცხადებს, რომ ქვეყანაში საკმარისი ადგილებია იმისთვის, რათა მოქალაქეები, რომელთაც კონტაქტი ჰქონდათ კორონავირუსით ინფიცირებულ ადამიანებთან და მაღალი რისკის ზონებიდან მოდიან, კარანტინში მოათავსონ. ამის შესახებ მინისტრმა დღეს, 27 თებერვალს გამართულ მთავრობის სხდომაზე განაცხადა.

მისივე თქმით, კორონავირუსისთვის საავადმყოფებია მობილიზებულია: თბილისში, ქუთაისსა და ბათუმში. როგორც ტიკარაძე ამბობს, ამ ეტაპისთვის კორონავირუსის ფართო გავრცელებისა და ეპიდემიის რისკი არ არსებობს.

"გუშინდელ დღემდე არ დაფიქსირებულა კორონავირუსის არცერთი ფაქტი საქართველოში და ის ფაქტი, რომელიც დაფიქსირდა იყო დროულად აღმოჩენილი, რამაც მოგვცა ჩვენ იმის საშუალება, რომ აღარ მომხდარა შემდგომი კონტაქტების გავრცელება. ეს ადამიანი მოთავსებული არის ინფექციურ საავადმყოფოში. გუშინ ღამით ინფექციური საავადმყოფოდან იმ 13 პაციენტის გადაყვანა განხორციელდა საკარანტინო ზოლში, რომლებიც არ იყვნენ ინფიცირებულები. ამ დროისათვის ინფექციურ საავადმყოფოში იმყოფება 10 პაციენტი, აქედან 5 არის იტალიიდან — 1 იტალიის და 4 საქართველოს მოქალაქე, 5 არის ირანიდან — 1 არის ქართველი და დანარჩენები აზერბაიჯანის მოქალაქეები არიან", — განაცხადა ტიკარაძემ.

26 თებერვალს საქართველოში კორონავირუსის პირველი შემთხვევა დაფიქსირდა. ვირუსი დაუდგინა საქართველოს მოქალაქეს რომელიც აზერბაიჯანის გავლით საქართველოში გუშინ შემოვიდა ირანიდან. ის გადაყვანილია ინფექციურ საავადმყოფოში

ბრიფინგზე ჯანდაცვის მინისტრმა, ეკატერინე ტიკარაძემ განაცხადა, რომ შესამოწმებლად გადაიყვანეს ის მესაზღვრეები, რომლებმაც კორონავირუსით ინფიცირებული პაციენტი აღმოაჩინეს. მისივე თქმით, ამ ეტაპზე პაციენტის ჯანმრთელობას საფრთხე არ ემუქრება და ქვეყანაში ეპიდემიის საფრთხე არ არსებობს.

ბრიფინგზე ცნობილი გახდა, რომ ჯანდაცვის სამინისტრო აფთიაქებს პირბადეების შემოტანაში დაეხმარება. მინისტრის განცხადებით, ამ დროისთვის საგანმანათლებლო დაწესებულებებში სწავლის შეწყვეტა არ იგეგმება.

ამავე თემაზე:

დაავადებათა კონტროლის ცენტრის ცხელი ხაზი 116 001.