ქართული ოცნების თავმჯდომარე, ბიძინა ივანიშვილი ეროვნული დემოკრატიული ინსტიტუტის (NDI) პრეზიდენტს, დერეკ მიტჩელს შეხვდა. პარტიის პრესსამსახურის ცნობით, შეხვედრა ცენტრალურ ოფისში გაიმართა, სადაც მხარეებმა ქვეყანაში მიმდინარე პოლიტიკურ პროცესებსა და წინასაარჩევნო გარემოზე ისაუბრეს.

NDI-ის წარმომადგენლობას შეხვდა პრემიერ მინისტრი გიორგი გახარიაც. მთავრობის ადმინისტრაციის მიერ გავრცელებულ განცხადებაში ვკითხულობთ, რომ მხარეებმა საქართველოში NDI-ის საქმიანობის სხვადასხვა მიმართულებები განიხილეს.

განცხადების თანახმად, მხარეებმა აღნიშნეს, რომ საარჩევნოდ მნიშვნელოვანია მაღალი პოლარიზაციის დონის შემცირება. პრემიერმა ხაზგასმით აღნიშნა, რომ 2020 წლის არჩევნები, ისევე, როგორც ყველა - 2012 წლის შემდეგ, უმაღლესი დონის საერთაშორისო სტანდარტების შესაბამისად ჩატარდება.

NDI ისევე, როგორც IRI არაერთხელ გამხდარა ხელისუფლების წარმომადგენლების კრიტიკის ობიექტი. ისინი ორგანიზაციას მიკერძოებულობაში და ოპოზიციის ინტერესების გატარებაში ადანაშაულებენ.

ნოემბერში ბიძინა ივანიშვილმა საქართველოში ჩატარებული პოლიტიკური კვლევების გამო უკმაყოფილება გამოთქვა. იმედის ეთერში მან თქვა, რომ მათ შესახებ კონგრესის, სენატისა და აშშ-ს პრეზიდენტის ადმინისტრაციის ინფორმირებისთვის ღია წერილის გამოქვეყნებასაც კი გეგმავს.

"იმდენად უნდოა ეს კვლევები, რომ შეიძლება ამაზეც მიდის მუშაობა, რომ აი, ამერიკული ორგანიზაციები ამას შეგნებულად ამახინჯებენ, რომ აჩვენონ, რომ მხარს უჭერენ ნაციონალურ მოძრაობას", — ამბობდა ივანიშვილი NDI-სა და IRI-ის კვლევებზე.

მმართველი გუნდის გარდა ამ ორგანიზაციებს უპირისპირდება პატრიოტთა ალიანსიც. ისინი საქართველოში ორგანიზაციების აკრძალვას და NDI-ს ქართული ოფისის ხელმძღვანელის, ლორა თორნტონის წინააღმდეგ გამოძიების დაწყებას ითხოვენ.