ფოთისა და ხობის მიტროპოლიტი მეუფე გრიგოლი ფიქრობს, რომ ცოცხალი პატრიარქის გამონათქვამების შეფასება "ცოტა უხერხულია". ასე უპასუხა მან ჟურნალისტების კითხვას იმის შესახებ, ვინ იგულისხმა პატრიარქმა, როცა განაცხადა, რომ 42 წელია ებრძვიან.

"კათალიკო-პატრიარქი ყოველთვის, 42 წლის მანძილზე და მანამდეც; დღესაც მიუხედავად მისი ჭარმაგი ასაკისა, ახერხებდა და ახერხებს იმ აზრების გამოთქმას, რაც მას უნდა და რასაც საჭიროდ თვლის. ამიტომ, თვითონ უკეთესად განმარტავდა თავის სიტყვას, ან განმარტავს, თუ ამას საჭიროდ ჩათვლის.

კომენტარს ვუკეთებთ მამების გამონათქვამებს, წმინდა წერილის განმარტებებია იგივე კომენტარები, მაგრამ ცოცხალი პატრიარქის სიტყვას კომენტარი გაუკეთო, ცოტა უხერხულია", — განაცხადა მან ჟურნალისტებთან.

გუშინ, 22 თებერვალს თიანეთისა და ფშავ-ხევსურეთის ეპარქიის წარმომადგენლებთან შეხვედრისას პატრიარქმა განაცხადა, რომ ის 42 წელია სამიზნეა. მისი თქმით, ხალხის თანადგომის გარეშე "ამ სიმძიმეებს" ვერ გაუძლებდა.