"მე არ ვიცი, სოფიო ქაცარავა ოდესმე გუნდიდან წასული იყო?" — ასე უპასუხა პრემიერ-მინისტრმა, გიორგი გახარიამ ჟურნალისტის კითხვას, რომელიც ყოფილი თანაგუნდელის, სოფიო ქაცარავას დიდ ბრიტანეთში ელჩად დანიშვნავს შეეხებოდა.

გუშინ, 20 თებერვალს საგარეო საქმეთა სამინისტრომ გაავრცელა ინფორმაცია, რომ სოფიო ქაცარავა დიდ ბრიტანეთში საქართველოს ელჩად დაინიშნა.

ქაცარავა საგარეო ურთიერთობათა კომიტეტის თავმჯდომარე იყო. მმართველი გუნდი და საპარლამენტო მანდატი მან მას შემდეგ დატოვა, რაც პროპორციული საარჩევნო სისტემის კანონპროექტი ჩააგდეს.

სამინისტროს ინფორმაციით, ქაცარავა იყო საქართველოს პარლამენტში გაერთიანებულ სამეფოსთან მეგობრობის ჯგუფის ხელმძღვანელი, ასევე, გაერთიანებულ სამეფოსთან უორდროპის სტრატეგიული დიალოგის საპარლამენტო მიმართულების ხელმძღვანელი. უწყების განცხადებითვე, 1998 წლიდან 2016 წლამდე ის სხვადასხვა პოზიციაზე მუშაობდა საქართველოში დიდი ბრიტანეთის საელჩოში და 2016 წელს მიენიჭა დედოფალ ელისაბედ მეორის ჯილდო.