კათალიკოს-პატრიარქი ილია II მოსკოვიდან, რუსეთის პატრიარქის, კირილე I-ის, 70 წლის იუბილეზე, მიწვევას დათანხმდა.

პატრიარქის მდივანმა მიქაელ ბოტკოველმა On.ge-ს უთხრა, რომ ილია ll რუსეთის დედაქალაქში 18 ნოემბერს გაემგზავრება:

"ალბათ 5 დღიანი ვიზიტი იქნება. მასთან ერთად იქნება 3 მღვდელმთავარი და კიდევ რამდენიმე სასულიერო პირი".

კითხვაზე, აპირებს თუ არა პატრიარქი შეხვედრებს რუსეთის პოლიტიკური წრის წარმომადგენლებთან, ბოტკოველმა გვიპასუხა, რომ მათ ამაზე ინფორმაცია ჯერჯერობით არ აქვთ:

"ჩვენც ვთხოვთ რუსულ მხარეს, რომ გადმოგვცენ შეხვედრების განრიგი, მაგრამ, როგორც ჩანს თვითონაც ჩამოყალიბების პროცესში არიან".