საქართველოს მეოთხე პრეზიდენტი, გიორგი მარგველაშვილი ამბობს, რომ პოლიტიკაში დასაბრუნებლად კონსულტაციებს იწყებს. როგორც მან გადაცემა სოფო ზურაბიანის პოლიტიკის ფორმულაში ისაუბრა, მან გადაწყვიტა შეეწინააღმდეგოს ქვეყანაში არსებულ ვითარებას.

"რანაირად შევეწინააღმდეგები, რომელი პარტიის სახით, თუ რა ფორმით, ამაზე მექნება კონსულტაციები", — აღნიშნა მარგველაშვილმა.

მისივე თქმით, დღეს პოლიტიკური პროცესის ლოკომოტივი მრგვალი მაგიდის გარშემო გაერთიანებული ოპოზიციაა და მისი გადაწყვეტილება ამ ფორმატის გაძლიერებისკენ იქნება მიმართული.

"ჯერ არ მქონია კონსულტაციები პოლიტიკოსებთან. ჯერ მაქვს კონსულტაციები ჩემი გუნდის შიგნით, სადაც მინდა, რომ ჩემს მეგობრებთან ერთად, იმ ადამიანებთან ერთად, ვისთანაც ერთად მე საპრეზიდენტო უფლებამოსილებას ვახორციელებდი, მათთან ერთად ჩამოვყალიბდე, რა უნდ იყოს მომავალი ნაბიჯები", — აღნიშნა ყოფილმა პრეზიდენტმა.

გადაცემის წამყვანმა, სოფო ზურაბიანმა მას შეახსენა, რომ მისი გუნდის დიდი ნაწილი ახლა მამუკა ხაზარაძისა და ბადრი ჯაფარიძის დაარსებულ პარტია ლელოშია, რაზეც მარგველაშვილმა თქვა:

"მერე რა. ლელო იმ გაერთიანებაშია, რომელიც მე მომწონს. ასე, რომ ლელოსთან საუბარი და კონსულტაციები არანაირ პრობლემა არ წარმოადგენს".