პარლამენტის ვიცე-სპიკერი მამუკა მდინარაძე აცხადებს, რომ ქართული ოცნება ოპოზიციის წარმომადგენლებს დიალოგის მაგიდასთან კვლავ იწვევს. მას შემდეგ, რაც ევროპული საქართველოს ლიდერს, გიგი უგულავას უზენაესმა სასამართლომ თავისუფლების აღკვეთა მიუსაჯა, ოპოზიციამ მმართველ პარტიასთან საარჩევნო სისტემის შესახებ მოლაპარაკებები შეწყვიტა.

12 თებერვლის ბრიფინგზე მამუკა მდინარაძემ განაცხადა, რომ ყველა პასუხისმგებლიანი პოლიტიკოსი დიალოგის რეჟიმში უნდა ჩაერთოს.

"მიგვაჩნია, რომ დიალოგსა და კონსენსუსს ალტერნატივა არ გააჩნია. ეს არის როგორც საზოგადეობის მოლოდინი, ასევე ჩვენი საერთაშორისო პარტნიორების რეკომენდაცია, რაც პროცესების სტაბილიზაციასა და არსებული გამოწვევების მშვიდობიანი, კონსტრუქციული გზით გადაწყვეტას გულისხმობს", — აღნიშნა პარლამენტარმა.

მდინარაძე ამბობს, რომ ქართული ოცნება უერთდება აშშ-ს საელჩოს წუხილს იმასთან დაკავშირებით, რომ უგულავასთვის თავისუფლების აღკვეთა და საარჩევნო სისტემის შესახებ დიალოგი დროში ერთმანეთს დაემთხვა:

"მაგრამ აღვნიშნავთ, რომ მართლმსაჯულების განხორციელების პრეროგატივა გააჩნია დამოუკიდებელ სასამართლოს და არა რომელიმე პოლიტიკოსს... გვინდა ცალსახად დავაფიქსიროთ, რომ პოლიტიკა დანაშაულის ჩამდენი პირებისთვის ვერ იქნება ინდულგენცია".

გარდა ამისა, მამუკა მდინარაძე ოპოზიციის წარმომადგენლებს ურჩევს, რომ თუ მათ მიაჩნიათ, რომ სასამართლოში უგულავას უფლებები დაირღვა, სტრასბურგის სასამართლოს მიმართონ:

"მოვუწოდებთ ოპონენტებს, შეწყვიტონ სამართლებრივი პროცესის პოლიტიკური მიზნებისთვის გამოყენება და დაუბრუნდნენ დიალოგის პროცესს".

უგულავას ახალი განაჩენი

თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა. მასთან ერთად შემადგენლობაში იყვნენ მოსამართლეები, მერაბ გაბინაშვილი და გიორგი შავლიაშვილი.

როგორც მისმა ადვოკატმა, ბექა ბასილაიამ თქვა, უგულავა უზენაესმა სასამართლომ იმ მუხლით გაასამართლა, რომლითაც 9-წლიანი პატიმრობა იყო გათვალისწინებული. თუმცა, ამ მუხლზე ამნისტია გავრცელდა, განახევრდა. იმის გამო, რომ მას მოხდილი ჰქონდა წელიწადი და ოთხი თვე, პატიმრობაში ყოფნა სამ წელზე მეტ ხანს მოუწევს.

საქმე ეხება თბილისის განვითარების ფონდის საქმეს, რაზეც გიგი უგულავა და მასთან ერთად ბრალდებული 4 პირი 2018 წლის თებერვალში დამნაშავედ სცეს. გიგი უგულავას პროკურატურა მერობის პერიოდში თბილისის განვითარების ფონდიდან 48 მილიონი ლარის მითვისება-გაფლანგვას ედავება.

2018 წლის თებერვალში თბილისის საქალაქო სასამართლომ თბილისის ყოფილი მერი გიგი უგულავა და მასთან ერთად ბრალდებული ოთხი პირი, ე.წ. ფონდების საქმეში დამნაშავედ ცნო. უგულავას მიუსაჯეს 1 წლითა და 3 თვით თავისუფლების აღკვეთა, თუმცა სხვა საქმეზე გამოტანილმა განაჩენმა ახალი განაჩენი შთანთქა. მას სასჯელი მოხდილად ჩაეთვალა.

ბრალდების მხარე ამტკიცებდა, რომ თბილისის მერმა და ერთიანი ნაციონალური მოძრაობის თბილისის საქალაქო ორგანიზაციის თავმჯდომარემ, გიგი უგულავამ მერიის სხვა მაღალჩინოსნებთან ერთად, შეიმუშავა დანაშაულებრივი სქემა: "თბილისის განვითარების ფონდის კუთვნილი თანხით 2012 წლის ოქტომბრის საპარლამენტო არჩევნებთან დაკავშირებული ერთიანი ნაციონალური მოძრაობის წინასაარჩევნო ხარჯების დასაფინანსებლად".