ენმ-ს ერთ-ერთი ლიდერი, დავით ბაქრაძე საპარლამენტო არჩევნების შედეგებს აფასებს და განმარტავს, რომ ქართული ოცნების საკონსტიტუციო უმრავლესობით პარლამენტში შესვლით ქვეყანამ ერთპიროვნული მმართველობა მიიღო:

"ზეწოლის დაშინების, მუქარის, ძალადობის, ადმინისტრაციული და ქუჩის რესურსისგამოყენების შედეგად, შეიქმნა ვითარება, როდესაც ქვეყანაში პოლიტიკურმა ძალამ, რომელმაც ამ ყველაფრის მიუხედავად, მიიღო მხოლოდ 48 პროცენტის მხარდაჭერა, მიიღო საკონსტიტუციო უმრავლესობა და ქვეყანაში შეიქმნა ერთპარტიული და ერთპიროვნული მმართველობა. ეს ის რეალობაა, რომელიც დღეს შეიქმნა და რომლის სამწუხარო შედეგებსაც მოსახლეობა უახლოესი წლები იგრძნობს. სწორედ რეალობასთან ბრძოლის გამო, ენმ-მ მიიღო გადაწყვეტილება გასულიყო მეორე ტურებში. ჩვენ ველოდებოდით ზეწოლასაც, ველოდებოდით ძალადობასაც, ველოდებოდით გაყალბებასაც, მაგრამ ჩვენ შევედით ბრძოლაში სწორედ იმიტომ, რომ არ ვაპირებდით გვეჩუქნა 45 ადგილი ქართული ოცნებისთვის. არ ვაპირებდით უბრძოლველად დაგვეთმო საკონსტიტუციო უმრავლესობა და მომავალ წლებში, როდესაც საზოგადოება იგრძნობს ერთპიროვნული და ერთპარტიული მმართველობის შედეგებს, ჩვენ ვიქნებით მორალურად მართალი, რადგან არ გავექეცით ბრძოლას, ბოლომდე ვიდექით ბრძოლაში, თუნდაც უთანასწორო პირობებში და ბოლომდე ვეცადეთ, რომ ამ ქვეყანაში ყოფილიყო დემოკრატიული, მრავალპარტიული სისტემა. ჩვენი ბრძოლა გრძელდება".