უმრავლესობის წევრი, დიმიტრი ხუნდაძე ევროპული საქართველოს ერთ-ერთი ლიდერის, გიგი უგულავას შესაძლო დაკავებაზე ამბობს, რომ პოლიტიკა იმუნიტეტი არავისთვის არ არის. მისივე თქმით, ოპოზიცია ყველა შესაძლო გამოძიებას, რომელიც ეხება პოლიტიკურ ფიგურას, პოლიტიკური დევნის საგნად "ფუთავს".

"კიდევ ერთხელ ვამბობ, პოლიტიკა არავისთვის არ არის იმუნიტეტი, რომ მან გადაცდომა ჩაიდინოს და ამაზე პასუხი არ მოეთხოვოს. დაველოდოთ სასამართლო გადაწყვეტილებას. მოგვწონს არ მოგვწონს, გვესიამოვნება თუ არა, ეს არის სასამართლოს გადაწყვეტილება", — განაცხადა დიმიტრი ხუნდაძემ.

10 თებერვალს უზენაესი სასამართლო ზეპირი მოსმენის გარეშე ე.წ. ფონდის საქმეზე გიგი უგულავას საქმე უნდა განიხილოს. გიგი უგულავა ამბობს, რომ ხელისუფლებასთან ვაჭრობასა და საპროცესო შეთანხმების გაფორმებას არ აპირებს. უგულავა არ გამორიცხავს, რომ ბოლო პერიოდში პოლიტიკოსების დაკავებები ხელისუფლებასთან ვაჭრობის საგანი იყოს.

2018 წლის თებერვალში თბილისის საქალაქო სასამართლომ თბილისის ყოფილი მერი გიგი უგულავა და მასთან ერთად ბრალდებული ოთხი პირი, ე.წ. ფონდების საქმეში დამნაშავედ ცნო.

ბრალდების მხარე ამტკიცებდა, რომ თბილისის რეაბილიტაციის მიზნით 2010 წლის 16 ივლისს, თბილისის მერიამ დააფუძნა ააიპ თბილისის განვითარების ფონდი. თბილისის მერმა და ერთიანი ნაციონალური მოძრაობის თბილისის საქალაქო ორგანიზაციის თავმჯდომარემ, გიგი უგულავამ მერიის სხვა მაღალჩინოსნებთან ერთად, შეიმუშავა დანაშაულებრივი სქემა: თბილისის განვითარების ფონდის კუთვნილი თანხით 2012 წლის ოქტომბრის საპარლამენტო არჩევნებთან დაკავშირებული ერთიანი ნაციონალური მოძრაობის წინასაარჩევნო ხარჯების დასაფინანსებლად.