ევროპული საქართველოს ლიდერი, გიგა ბოკერია "სააკაშვილის პირადი შტაბის" გახსნას გამოეხმაურა და თქვა, რომ ოპოზიციური პარტიების გაერთიანების შეხვედრების ფორმატი უცვლელი რჩება. TV პირველის ეთერში საუბრისას გიგა ბოკერიამ აღნიშნა, რომ ოპოზიციურ პარტიებს გეგმა და ხედვა უკვე განსაზღვრული აქვთ:

"მე არ მახსოვს ეტაპი, რომ მიხეილ სააკაშვილი არ ყოფილიყოს ჩართული ქართულ პოლიტიკაში. ამაში რაღაც რევოლუციურ სიახლეს ვერ ვხედავ... ბატონი სააკაშვილი ან მისი პოლიტიკური გუნდი რაიმე ინიციატივით გამოვა, თუ არა ეს ბუნებრივია მათი გადასააწყვეტია, მაგრამ პროპორციულ არჩევნებთან დაკავშრებით შეხვედრები იმართება ლეიბორისტული პარტიის ოფისში და ასე გაგრძელდება...

ვაგრძელებთ საპროტესტო აქციებს, ცუდი სცენარისთვისაც მზად ვარ. მოვახდენთ კოორდინირებას მაჟორიტარულ ოლქებში, რომ გამოვრიცხოთ ის, რაც მოხდა საპრეზიდენტო არჩევნების მეორე ტურში".

საქართველოს ყოფილმა პრეზიდენტმა, მიხეილ სააკაშვილმა განაცხადა, რომ ხელისუფლების წინააღმდეგ ბრძოლაში პირადად ჩაებმება. მისი თქმით, პირველი მარტიდან "სააკაშვილის საპრეზიდენტო ბიბლიოთეკის" ბაზაზე გახსნის საკუთარ შტაბს გახსნის:

"რა თქმა უნდა, მე გვერდზე ვერ გავდგები და გადავწყვიტე, უკვე ღიად, აქტიურად, ორგანიზაციულად, ჩავერთო ჩვენი ხალხის დასახმარებლად, ივანიშვილის რეჟიმის მოსაშორებლად და საქართველოს სწრაფი განვითარების გზაზე მყარად დასაბრუნებლად".

პროპორციული საარჩევნო სისტემის დაპირების არშესრულებამ ერთმანეთსდაპირისპირებული ოპოზიცია გააერთიანა. შეიქმნა პლატფორმა — ყველა მინუს ერთი, რომლის ფარგლებშიც სხვადასხვა ოპოზიციური პარტია და სამოქალაქო აქტივისტები საარჩევნო სისტემის საკითხს განიხილავენ და საპროტესტო აქციებს მართავენ. პარალელურად, საარჩევნო სისტემის საკითხზე იმართება დიპლომატების მიერ ორგანიზებული შეხვედრები მმართველ გუნდთან.

ლეიბორისტული პარტიის ოფისში პერიოდულად იკრიბებიან ნაციონალური მოძრაობის, ევროპული საქართველოს, ლელოს, დემოკრატიული მოძრაობის, ახალი საქართველოსა და სხვა პოლიტიკური პარტიის ლიდერები.

მანამდე, პროპორციული საარჩევნო სისტემა ერთ-ერთი მთავარი მოთხოვნა იყო, რომელიც მოძრაობა #სირცხვილიამ ხელისუფლებას მას შემდეგ წამოუყენა, რაც რუსი დეპუტატის, სერგეი გავრილოვის ვიზიტის გამო აქციები დაიწყო. პროტესტის მეხუთე დღეს მმართველ გუნდს დათმობაზე მოუწია წასვლა. პარტიის ლიდერმა, ბიძინა ივანიშვილმა საზოგადოებას ამცნო, რომ 2020 წელს არჩევნებს პროპორციული სისტემითა და ნულოვანი ბარიერით ჩაატარებდნენ, თუმცა პირობა არ შესრულდა.