ქართული ოცნების მაჟორიტარი დეპუტატი, გურამ მაჭარაშვილი ამბობს, რომ თუკი მამუკა ხაზარაძემ ბიძინა ივანიშვილთან ბიზნეს ცენტრში გამართულ შეხვედრაზე არ უნდა ისაუბროს, რადგან თავადაც ესწრებოდა. დეპუტატის თქმით, თუ ამ ტიპის შეხვედრები არასწორია, თავადაც არ უნდა დასწრებოდა:

"თუ მას მიაჩნდა და მიაჩნია, რომ ასეთი ტიპის შეხვედრები არ უნდა იმართებოდეს, მინიმუმ მას არ უნდა მიეღო მონაწილეობა. თუკი მიიღებ მონაწილეობას, ასეთ შემთხვევაში, ელემენტარული წერია, რომ თუ იღებ მონაწილეობას შენი ნებით, ძალით ხომ არავის მიუყვანია, მაშინ აღარ უნდა გქონდეს ამაზე განცდა და მითუფრო ეს საჯაროდ არ უნდა გამოიტანო".

მამუკა ხაზარაძემ რამდენიმე თვის წინ TV პირველის ეთერში თქვა, რომ ბიძინა ივანიშვილის ბიზნესცენტრში ანაკლიის პორტზე ისაუბრა, სადაც შეხვედრას მაშინდელი გენერალური პროკურორი, ირაკლი შოთაძეც დაესწრო. მისი თქმით, ივანიშვილმა იქ "სასამართლო მოაწყო, სადაც მოსამართლე თავად იყო".

დღეს, 4 თებერვალს გენერალური პროკურორის კანდიდატის რანგში ირაკლი შოთაძესთან გასაუბრება გაიმართა. შოთაძე ბიძინა ივანიშვილთან ბიზნესცენტრში მამუკა ხაზარაძის და ვანო ჩხარტიშვილის შეხვედრის დეტალებს "ვერ იხსენებს", თუმცა ახსოვს, რომ ამ შეხვედრის შემდეგ ყველა "მადლიერი" დარჩა. აღნიშნული შეხვედრის შესახებ შოთაძეს კითხვა საპროკურორო საბჭოში გასაუბრებაზე ევროპული საქართველოს წევრმა, ოთარ კახიძემ დაუსვა. კახიძე დაინტერესდა, რა სტატუსით ესწრებოდა მაშინდელი მოქმედი გენერალური პროკურორი ივანიშვილის ბიზნესცენტრში გამართულ შეხვედრას.