ყოფილი გენერალური პროკურორის და გენერალური პროკურორობის კანდიდატის, ირაკლი შოთაძის თქმით, მისი არჩევის შემთხვევაში პროკურატურა სამართლიანობის აღდგენისთვის მაქსიმუმს გააკეთებს.

ირაკლი შოთაძეს სამართლიანობის აღდგენასთან დაკავშირებით გასაუბრებაზე კითხვა ქართული ოცნების წევრმა, ანრი ოხანაშვილმა დაუსვა.

"ბევრი მიმართულებით არის სამუშაო და, რაც მთავარია, აქ მარტო პროკურატურა თავს ვერ გაართმევს ამ გამოწვევას. პროკურატურამ თავისი წილი ვალდებულება უნდა შეასრულოს და სხვა სახელმწიფო უწყებებიც ამ მიმართულებით აქტიურ ქმედებებში უნდა ჩაერთონ. ამისთვის საჭიროა გაგრძელდეს დისკუსიები, ფართო მსჯელობა მულტიდისციპლინური შემადგენლობით, რომ იყოს ამ პროცესის დაჩქარების გზები ნაპოვნი. ეს არ არის, რა თქმა უნდა, მარტივი, მაგრამ ფაქტია, რომ ეს არის ჩვენი ვალდებულება. მე ჩემის მხრივ კიდევ ერთხელ განვმეორდები, რომ სამართლიანობის აღდგენის კუთხით, მაქსიმუმს იზავს პროკურატურა იმ შემთხვევაში, თუ, რა თქმა უნდა, მე გენერალურ პროკურორად ამირჩევენ", — თქვა ირაკლი შოთაძემ.

ყოფილმა გენერალურმა პროკურორმა გასაუბრების დროს აღნიშნა, რომ სამართლიანობა დღეს დიდი და აქტუალური პრობლემაა, რომელიც პროკურატურისთვის გამოწვევად რჩება. ირაკლი შოთაძემ გასაუბრების დროს თქვა, რომ მისი არჩევის შემთხვევაში პროკურატურა დამოუკიდებელი იქნება.

გენერალური პროკურორის თანამდებობა ვაკანტური მას შემდეგ გახდა, რაც მოქმედი გენერალური პროკურორი შალვა თადუმაძე უზენაესი სასამართლოს უვადო მოსამართლედ დაინიშნა. გენერალური პროკურორობა 16 კანდიდატს სურს.

ოპოზიციისა და სამოქალაქო საზოგადოების კრიტიკა გამოიწვია შოთაძის კანდიდატურამ, რომელმაც თანამდებობა 2018 წელს, მას შემდეგ დატოვა, რაც თბილისის საქალაქო სასამართლოს გადაწყვეტილებით ხორავას ქუჩის საქმეზე არასრულწლოვანი დავით სარალიძის მკვლელი ვერ გამოვლინდა და საპროტესტო აქცია დაიწყო. შოთაძის გადადგომას მოკლულის მამა ზაზა სარალიძე და მისი მხარდამჭერები ითხოვდნენ.

პროკურატურიდან წასვლის შემდეგ შოთაძე ტექნიკურ უნივერსიტეტში საერთაშორისო სამართლის ფაკულტეტის მიწვეულ ასოცირებულ პროფესორად მუშაობდა. გარდა ამისა, ის სილქნეტის იურიდიული კონსულტანტი იყო. არასამთავრობოები მოუწოდებენ საპროკურორო საბჭოს, ირაკლი შოთაძის კანდიდატურას მხარი არ დაუჭირონ.