აშშ-ში საქართველოს ელჩი, დავით ბაქრაძე ამბობს, რომ კონგრესთან კომუნიკაციის ნაკლებობას არ განიცდიან და მათთან ურთიერთობაში ჩართულები და ძალიან გახსნილები არიან. თუმცა, აშშ-ს წარმომადგენელთა პალატის წევრებს "ძალიან უხერხულობაში აყენებენ" ისინი, ვინც არასწორ ინფორმაციას აწვდიან.

როგორც ბაქრაძე ამბობს, საელჩოში მუშაობენ იმაზე, რომ ამერიკელებს "ზუსტი ინფორმაციის" მიწოდებით ის "უზუსტობები" დაანახონ, რაც კონგრესმენების წერილში იყო.

"საქართველოს მეგობართა ჯგუფის წერილში ის ფაქტობრივი უზუსტობები, ასე ვთქვათ, თვლადი კრიტერიუმებითაც დანახული კრიტერიუმები, რომელიც წერილშია, შეეხებოდა ეს ქვეყნის ეკონომიკურ ზრდას, რომლის მაჩვენებელიც ჩვენ ძალიან მაღალი გვაქვს რეგიონში, განსაკუთრებით სხვა ქვეყნებთან შედარებით. შეეხებოდა ეს ინვესტიციების რაოდენობას თუ შეეხებოდა საქართველოს ანტიდასავლურ კურსთან რაიმე კითხვებს, რომელიც პირდაპირი ფაქტობრივი უზუსტობა იყო... [კონგრესმენები] გარკვეულ არაზუსტ ინფორმაციაზე აწერენ ხელს", — განაცხადა ბაქრაძემ.

24 იანვარს საქართველოს მთავრობას კრიტიკული გზავნილები კიდევ ორმა კონგრესმენმა გამოუგზავნა. კონგრესმენმა ბრაიან ბაბინიმ დაწერა, რომ ქვეყნის ისტორიაში პირველად, საქართველო და ქვეყნისთვის გაწეული რესურსები საფრთხილო და ნეგატიურ კონტექსტში განიხილება. კონგრესმენმა პეტ ოლსონმა კი განაცხადა, რომ კორუმპირებული საქართველოს მთავრობა თავს ესხმის დემოკრატიულ ღირებულებებს.

ამერიკელმა კონგრესმენებმა საქართველოს პრემიერ-მინისტრს რამდენიმე კრიტიკული წერილი მისწერეს, რომელშიც სხვადასხვა საკითხს ეხმიანებიან, მათ შორის ანაკლიის პორტს, ოპოზიციის ლიდერების წინააღმდეგ მიმდინარე გამოძიებებსა, არჩევნებსა და მედიას.

გუშინ, 26 იანვარს, ერთიანმა ნაციონალური მოძრაობამ სენატორ როჯერ ვიკერის წერილი გაასაჯაროვა. მათი თქმით, წერილი სენატორმა გიორგი გახარიას დეკემბრის თვეში გამოუგზავნა. გასაჯაროებულ წერილში სენატორი აღნიშნავს, რომ წარმატებული დემოკრატიული წინსვლასთან დაკავშირებით ბოლოდროინდელ მოვლენებზე შეშფოთებულია.

გაიგეთ მეტი: