მართალია, ნეტფლიქსმა სახელი თავისი მრავალფეროვანი სერიალებით გაითქვა, მაგრამ კომპანია ბოლო პერიოდია აქტიურად ცდილობს კინოინდუსტრიაშიც მოიკიდოს ფეხი და გავლენიან რეჟისორებთან ერთად, შედარებით უცნობ ხელოვანებსაც დაუთმოს თავისი პლატფორმა კინოს შესაქმნელად.

ნეტფლიქსის მცდელობა უშედეგო არ არის და ის ერთ-ერთ ყველაზე კონკურენტუნარიან კომპანიად ჩამოყალიბდა, რომლის მიერ წარმოებული პროდუქტიც წლევანდელი ოქროს გლობუსის დაჯილდოების 25 ნომინაციიდან 17-ში იყო წარდგენილი.

როგორც ჩანს, ნეტფლიქსი წელსაც არაერთ საინტერესო კინოსურათს შემოგვთავაზებს და მათ შორის ერთ-ერთი The Last Thing He Wanted იქნება, რომელშიც მთავარ როლებს ენ ჰეთეუეი, ბენ აფლეკი და უილიამ დეფო ასრულებენ.

ფილმი ცნობილი ამერიკელი მწერლის, ჯოან დიდიონის 1996 წელს გამოქვეყნებული ამავე სახელწოდების მქონე რომანის მიხედვით გადაიღეს, რომელიც ამერიკელი ჟურნალისტის, ელენა მაკმენის საოცრად დაძაბული ისტორიის შესახებ მოგვითხრობს.

ფილმის რეჟისორი დი რისია, რომელსაც მანამდე გადაღებული აქვს ფილმები Pariah (2011), Bessie (2015) და Mudbound (2017). მათ შორის ამ უკანასკნელმა ოსკარის ოთხი ნომინაცია დაიმსახურა.

The Last Thing He Wanted-ის პრემიერა სანდენსის კინოფესტივალზე შედგა, ნეტფლიქსის მომხმარებლებს კი მისი ხილვა 21 თებერვლიდან შეეძლებათ.