იუსტიციის მინისტრი თეა წულუკიანი სასაცილოს უწოდებს იმ რეაქციას, რაც პარლამენტის წინ მწვანე ღობის დადგმაზე ოპოზიციასა და სამოქალაქო საზოგადოებას ჰქონდა. ის ამბობს, რომ ოპოზიციამ "ისტერიკა მოაწყო" და ასეთ პოლიტიკურ ჯგუფს შანსი არ აქვს, არჩევნებში გაიმარჯვოს.

"მშვიდობიანი პროტესტი შეიძლება იქვე მოაწყო, ღობესთანაც მოაწყო და კიდევ სხვა ადგილებშიც", — განაცხადა მან.

მწვანე ღობე პარლამენტის წინ მას შემდეგ დაიდგა, რაც გუშინ, 21 იანვარს საახალწლო ატრაქციონები აიღეს, რომლებიც 2019 წლის 31 დეკემბერს აქტივისტებთან დაპირისპირებისა და დაკავებების ფონზე დაიდგა. დღეს თბილისის მერმა, კახა კალაძემ განაცხადა, რომ პარლამენტის წინ, იქ, სადაც მალხაზ მაჩალიკაშვილის კარავი იდგა, სარეაბილიტაციო სამუშაოების დაწყება გადაწყვიტეს.

მაჩალიკაშვილი ამბობს, რომ მისი პროტესტი იქ მაინც გაგრძელდება და "კარვებიც დაიდგმება და ბანერიც".

პარლამენტის წინა ტერიტორია თბილისი მერიამ 30 დეკემბერს, ღამით მორეცხა. კარვების აყრისა და ტერიტორიის გაწმენდის შემდეგ მერიამ აქ საახალწლო ატრაქციონები დაამონტაჟა. 31 დეკემბერს პოლიციელებსა და აქტივისტებს შორის დაპირისპირებისას სამართალდამცავებმა ძალით გაიყვანეს #სირცხვილიას აქტივისტები და ჯამში 9 პირი დააკავეს.

მერიამ პარლამენტის შენობის წინ შადრევნის გარემონტებისთვის ტენდერი რამდენჯერმე გამოაცხადა. 2018 წელს მომზადებული სატენდერო პირობების მიხედვით პროექტის ღირებულება 19 706 ლარი იყო. საპროექტო ობიექტის აღწერაში მითითებული იყო, რომ პარლამენტის შენობის წინ მოედანზე, განთავსებულია შადრევანი, რომლის სატუმბი სადგური მდებარეობს მიწის ქვეშ. ატმოსფერული ნალექების მოსვლის დროს კი წყალი ჟონავს, რაც საფრთხეს უქმნის და აზიანებს მიწისქვეშ განთავსებულ სატუმბ სადგურს.