ქართული ოცნების მაჟორიტარი დეპუტატი, დიმიტრი ხუნდაძე ამერიკელი კონგრესმენებისა და ევროპარლამენტის კრიტიკას "პირად ინტერესთან" და ნაციონალურ მოძრაობასთან აკავშირებს. TV პირველის ეთერში საუბრისას ხუნდაძე ამერიკელ კონგრესმენზე, ადამ კინზინგერზე ამბობს, რომ "ის თვითონ არის მაჟორიტარი" კონგრესში:

"კონგრესმენი კინზინგერი, თვითონ არის მაჟორიტარი და არცერთი განცხადება არ გაუკეთებია, როცა ჩვენ ამერიკულ საარჩევნო სისტემას ვთავაზობთ, დემოკრატიულად აღიარებს პროპორციულ სისტემას... ნაციონალური მოძრაობა ეძებს თითო ოროლა კონგრესმენს და ევროპარამენტარს, ესაა მათი მაქსიმუმი".

გუშინ, 21 იანვარს ევროპარლამენტში საგარეო ურთიერთობათა კომიტეტის სხდომაზე მყოფი საქართველოს დელეგაცია ევროპარლამენტარებმა ქვეყანაში არსებული პოლიტიკური ფონის გამო გააკრიტიკეს. მათ პროპორციულ საარჩევნო სისტემაზე დაუსვეს კითხვები. ისინი დაინტერესდნენ, რატომ არ შეასრულა მთავრობამ დაპირება და რატომ დაიწყო რამდენიმე გამოძიება ოპოზიციის ლიდერების წინააღმდეგ.

22 იანვრის დილას ცნობილი გახდა, რომ პრემიერ-მინისტრ გიორგი გახარიას ოთხმა ამერიკელმა კონგრესმენმა წერილი გამოუგზავნა. კონგრესმენ კინზინგერის ინფორმაცით, კონგრესმენები გახარიასთვის მიწერილ წერილში შეშფოთებას გამოთქვამენ საქართველოში არსებული ვითარების გამო.

პროპორციული საარჩევნო სისტემა ერთ-ერთი მთავარი მოთხოვნა იყო, რომელიც მოძრაობა #სირცხვილიამ ხელისუფლებას მას შემდეგ წამოუყენა, რაც რუსი დეპუტატის, სერგეი გავრილოვის ვიზიტის გამო აქციები დაიწყო. პროტესტის მეხუთე დღეს მმართველ გუნდს დათმობაზე მოუწია წასვლა. პარტიის ლიდერმა, ბიძინა ივანიშვილმა საზოგადოებას ამცნო, რომ 2020 წელს არჩევნებს პროპორციული სისტემითა და ნულოვანი ბარიერით ჩაატარებდნენ, თუმცა პირობა არ შესრულდა.

პროპორციულ სისტემაზე კანონპროექტის ჩაგდების შემდეგ შეიქმნა პლატფორმა — ყველა მინუს ერთი, რომლის ფარგლებშიც სხვადასხვა ოპოზიციური პარტია და სამოქალაქო აქტივისტები საარჩევნო სისტემის საკითხს განიხილავენ და საპროტესტო აქციებს მართავენ.