გირჩის ლიდერი ზურაბ ჯაფარიძე აცხადებს, რომ პროპორციული საარჩევნო სისტემაზე ნაციონალური მოძრაობის ლიდერის, გრიგოლ ვაშაძის განცხადების გამო მასთან ნებისმიერ ფორმატში ურთიერთობას წყვეტენ. მისი თქმით, გააგრძელებენ ნაციონალურ მოძრაობასთან კონსულტაციებს საარჩევნო სისტემის საკითხებზე, მაგრამ მხოლოდ იმ შემთხვევაში თუ ვაშაძე არ იქნება წარმომადგენელი.

"ოპოზიციის ერთიანი საკონსულტაციო ფორმატის იმ შეხვედრებში, სადაც ეს ადამიანი იქნება ნაციონალური მოძრაობის წარმომადგენელი და პარტიის პოზიციის გამხმოვანებელი, ჩვენ მონაწილეობას არ მივიღებთ. კიევიდან როგორ ჩანს არ ვიცი, მაგრამ აქ ყ*ე არავინ არ არის", — წერს ის ფეისბუქგვერდზე.

გრიგოლ ვაშაძე საზოგადოებრივი პროტესტის შემდეგ ბიძინა ივანიშვილისგან პროპორციულ საარჩევნო სისტემაზე გადასვლის დაპირებას საკუთარი პარტიის დამსახურებად მიიჩნევს. ამის შესახებ ვაშაძემ მთავარი არხის ეთერში ისაუბრა.

როგორც ვაშაძემ განაცხადა, ახალგაზრდების პროტესტი "შესანიშნავია". თუმცა, პროპორციული არჩევნების იდეა ნაციონალური მოძრაობიდან მოდის და ამის "დოკუმენტალური მტკიცებულებაც" არსებობს.

"ერთიანმა ნაციონალურმა მოძრაობამ მოითხოვა და გამოგლიჯა ხელიდან ოლიგარქს გაერთიანებულ ოპოზიციასთან ერთად პროპორციული არჩევნების დაპირება. დიდი ბოდიში მომიხდია, მთელი საპრეზიდენტო კამპანია პროპორციულ არჩევნებზე ვლაპარაკობდი. გავსებული იქნება რუსთავი 2-ის არქივი. დიდი მადლობა ყველას, ვინც ამ მოძრაობაში მონაწილეობას იღებს, მაგრამ კიდევ ერთხელ ვიმეორებ, როდესაც ჩვენმა პარტიამ და გაერთიანებულმა ოპოზიციამ დავიწყეთ კოალიციურ მთავრობაზე და პროპორციულ არჩევნებზე საუბარი, ეს კაციშვილს არ უხსენებია", — განაცხადა ვაშაძემ.

პროპორციული საარჩევნო სისტემა ერთ-ერთი მთავარი მოთხოვნა იყო, რომელიც მოძრაობა #სირცხვილიამ ხელისუფლებას მას შემდეგ წამოუყენა, რაც რუსი დეპუტატის, სერგეი გავრილოვის ვიზიტის გამო აქციები დაიწყო. პროტესტის მეხუთე დღეს მმართველ გუნდს დათმობაზე მოუწია წასვლა. პარტიის ლიდერმა, ბიძინა ივანიშვილმა საზოგადოებას ამცნო, რომ 2020 წელს არჩევნებს პროპორციული სისტემითა და ნულოვანი ბარიერით ჩაატარებდნენ, თუმცა პირობა არ შესრულდა.

პროპორციულ სისტემაზე კანონპროექტის ჩაგდების შემდეგ შეიქმნა პლატფორმა — ყველა მინუს ერთი, რომლის ფარგლებშიც სხვადასხვა ოპოზიციური პარტია და სამოქალაქო აქტივისტები საარჩევნო სისტემის საკითხს განიხილავენ და საპროტესტო აქციებს მართავენ.