სულ ცოტა ხნის წინ ცნობილი გახდა შვედეთის ერთ-ერთი ყველაზე ცნობილი და გავლენიანი კინოდაჯილდოების, Guldbagge Awards-ის 2020 წლის გამარჯვებულების ვინაობა და მათ შორის 19 ნომინაციიდან ოთხი ჯილდო ქართულ-შვედურ პროექტს, And Then We Danced-ს გადაეცა.

აღსანიშნავია, რომ ქართული წარმოშობის შვედი რეჟისორის, ლევან აკინის დრამა თითქმის ყველა მთავარი ნომინაციის ტრიუმფატორი გახდა: კინოსურათი დასახელდა წლის საუკეთესო ფილმად და ასევე დაჯილდოვდა, როგორც საუკეთესო სცენარის მქონე ნამუშევარი.

დაჯილდოების ჟიურის არ გამორჩენია არც ფილმში მთავარი როლის შემსრულებელი: მსახიობ ლევან გელბახიანს And Then We Danced-ში შესრულებული როლისთვის საუკეთესო კაცი მსახიობის ჯილდო გადაეცა.

ეს ლევან აკინის გახმაურებული ფილმის პირველი წარმატება არ არის, მანამდე ის არაერთი საერთაშორისო დაჯილდოების გამარჯვებული გახდა, მათ შორის ჩიკაგოს ფესტივალის, სარაევოს ფესტივალის და ა.შ.

Guldbagge Awards პრესტიჟული შვედური კინოდაჯილდოებაა, რომელიც 1964 წლიდან იმართება და წლის ყველა მნიშვნელოვან შვედურ პროექტს შორის გამარჯვებულებს ასახელებს. დაჯილდოებას მართავს შვედეთის კინოცენტრი, რაც შვედეთში ოსკარების ამერიკული კინოაკადემიის ეკვივალენტია.