ტელეკომპანია Fox 21-ისა და Showtime-ის ერთობლივი გახმაურებული სატელევიზიო შოუ Homeland, რომელიც ისრაელური სერიალის Prisoners of War-ის ამერიკული რიმექია, წელს მერვე სეზონით სრულდება.

სულ ცოტა ხნის წინ სერიალის ბოლო სეზონის ფინალური ტრეილერი გავრცელდა, სადაც ტერორიზმთან მებრძოლი სპეციალისტების დაძაბული ისტორიის გაგრძელებას ვეცნობით: მთავარი გმირი, კერი მეთისონი რუსულ ძალებთან ტყვეობის შემდეგ ფსიქიკური ტრავმებით იტანჯება, ამავდროულად კი ამერიკის მთავრობას ის ჯაშუში ჰგონია.

შექმნილი დაძაბული ვითარების მიუხედავად, როგორც ჩანს, კერი მარტო არ არის — მას მხარში უდგას სოლ ბერენსონი, რომელიც ამჯერად ეროვნული უსაფრთხოების მრჩეველია.

Homeland ტელეეკრანებზე პირველად 2011 წელს გამოჩნდა და მისმა შემქმნელებმა, ჰოვარდ გორდონმა და ალექს განსამ მოახერხეს, რომ მილიონობით ერთგული მაყურებელი შეეძინათ.

სერიალის მერვე სეზონის პრემიერა 9 თებერვალს შედგება და ამით ერთ-ერთი ყველაზე ცნობილი ამერიკული სატელევიზიო შოუც დასრულდება.