ქართული ოცნების დეპუტატი, კარლო კოპალიანი ტექნიკურ უნივერსიტეტში კანცლერად არჩევის შემდეგ პარლამენტს ტოვებს.

"თუკი ჩემი არჩევა მოხდებოდა ტექნიკურ უნივერსიტეტში, რა თქმა უნდა ეს შეუთავსებადია დეპუტატობასთან. არ შეიძლება სხვაგვარად, კანცლერი და დეპუტატი ორივე ერთად ვერ იქნები. 12 წელია მე პარლამენტში ვარ, ახლა სხვები მოვლენ, ახალგაზრდები. ჩემი მშობლიური უნივერსიტეტია გეპეი და ვუბრუნდები ჩემს უნივერსიტეტს", — თქვა On.ge-სთან საუბრისას კარლო კოპალიანმა.

ტექნიკურ უნივერსიტეტში კანცლერის არჩევნები დღეს, 8 იანვარს ჩატარდა. არჩევნებში კარლო კოპალიანი უკონკურენტო იყო, რადგან ორმა პიროვნებამ საკუთარი კანდიდატურები მოხსნეს. კოპალიანის თქმით, კარგი იქნებოდა მისი არჩევა უფრო კონკურენტუნარიან გარემოში მომხდარიყო. კარლო კოპალიანმა 2018 წელს, საქართველოს ტექნიკურ უნივერსიტეტში, როგორც სრულმა პროფესორმა, ერთ თვეში 5 640 ლარი აიღო.