ირანის სახელისუფლებო მედიის ინფორმაციით, ამერიკაზე საპასუხო შეტევების შემდეგ გენერალ ყასემ სოლეიმანი მშობლიურ ქალაქ ქერმანში დაკრძალეს.

დაკრძალვა გუშინ, 7 იანვარს იგეგმებოდა, თუმცა ცერემონიალზე ჭყლეტის დროს 40-მდე ადამიანი გარდაიცვალა და 213 ადამიანი დაშავდა. ამ მიზეზით დაკრძალვა გადაიდო. The Guardian წერდა, რომ მსგავსი ხალხმრავლობა 1989 წლის შემდეგ არ ყოფილა, როდესაც აიათოლა რუჰოლა ხომეინი დაკრძალეს.

დაკრძალვამდე რამდენიმე საათით ადრე ირანის სამხედრო ძალებმა ერაყში არსებულ მინიმუმ ორ ამერიკულ ბაზას ბალისტიკური რაკეტები ესროლა. აშშ-ის ცნობით, ამერიკული სამხედრო ბაზების მიმართულებით სულ მცირე 12 რაკეტა ისროლეს. ირანის საგარეო საქმეთა მინისტრმა თქვა, რომ მათ პროპორციული ზომები მიიღეს და სიტუაციის გამწვავება არ სურთ.

ბაღდადის აეროპორტში აშშ-ს საჰაერო თავდასხმის შედეგად ირანელი გენერლის, ყასემ სოლეიმანის მოკვლას ახლო აღმოსავლეთში სიტუაციის გამწვავება მოჰყვა. სოლეიმანი ირანში მეორე ყველაზე გავლენიან ადამიანად მიიჩნეოდა. შეერთებული შტატების ხელისუფლება კი მას ტერორისტად და ამერიკელი სამხედროების საფრთხედ განიხილავდა. სოლეიმანის მკვლელობის შემდეგ ირანმა ბირთვული შეთანხმება დატოვა.

გაიგეთ მეტი: