უცხოურ მედიაში სულ ცოტა ხნის წინ გავრცელებული ცნობების თანახმად, კინოსტუდია Fox Searchlight ბობ დილანის ბიოგრაფიის შესახებ ფილმის გადაღებას აპირებს, მთავარი როლის შესასრულებლად კი ახალგაზრდა მსახიობთან, ტიმოთი შალამესთან აწარმოებს მოლაპარაკებებს.

ეს 24 წლის ამერიკელი მსახიობი განსაკუთრებით ცნობილი 2017 წლის ფილმში Call Me by Your Name შესრულებული როლით გახდა. მას შემდეგ დროის მოკლე მონაკვეთში ტიმოთი შალამემ კიდევ არაერთ მნიშვნელოვან პროექტში მიიღო მონაწილეობა, მათ შორის 2019 წელს მან გრეტა გერვიგის ფილმ Little Women-ში ითამაშა, 2020 წლის ბოლომდე კი დენი ვილნევის დამაინტრიგებელ პროექტში, Dune-შიც ვიხილავთ.

ბობ დილანის შესახებ გადაღებული ფილმის რეჟისორი ჯეიმს მანგოლდი იქნება, რომელსაც მანამდე სხვადასხვა დროს გადაუღია ისეთი ცნობილი ფილმები, როგორებიცაა Girl, Interrupted, Logan და Walk The Line.

ბოლო პერიოდში ცნობილი მომღერლების შესახებ აქტიურად იღებენ ბიოგრაფიულ ფილმებს. მათ შორის 2018 წელს გადაღებული Bohemian Rhapsody ფრედი მერკურის შესახებ და 2019 წლის ფილმი Rocketman, რომელიც ელტონ ჯონის თავბრუდამხვევი ცხოვრების შესახებ მოგვითხრობს, საკმაოდ წარმატებული პროექტები გამოდგა.

შესაბამისად, შეგვიძლია ვივარაუდოთ, რომ ერთ-ერთი ყველაზე ლეგენდარული ამერიკელი შემსრულებლის, ბობ დილანის შესახებაც უახლოეს მომავალში საინტერესო კინოსურათს ვიხილავთ.