ზუგდიდის ყოფილი მერი, ლაშა გოგია შაბათ-კვირას ციხეს ვეღარ დატოვებს. ინფორმაცია On.ge-ს პენიტენციურ სამსახურში დაუდასტურეს. როგორც უწყებაში ამბობენ, "ამ ადამიანმა ვერ გამოავლინა ის ქცევა, რაც გულისხმობს დანაშაულის გაცნობიერებას". შესაბამისად, ლაშა გოგიას გარეთ გასვლის შეღავათი აქვს გაუქმებული.

ლაშა გოგია დიდი ოდენობით ქრთამის აღებისთვის იხდის სასჯელს. რამდენიმე დღის წინ ადგილობრივმა მედიამ odishinews-მა გამოაქვეყნა ფოტო, სადაც ასახულია ზუგდიდის ყოფილი მერი, ლაშა გოგია რესტორანში, ცოლთან ერთად. რესტორანში ყოფნის ამსახველი ფოტო გოგიას ცოლმა, ნანა თოდუამ ფეისბუქზე გამოაქვეყმა.

პენიტენციურ სამსახურში მაშინ On.ge-ს განუმარტეს, რომ პატიმარ ლაშა გოგიას სასჯელის ვადად ერთ წელზე ნაკლები აქვს დარჩენილი, იგი არის პატიმრის გათავისუფლებისათვის მომზადების ნაწილში და უქმეებზე ციხის დატოვება შეუძლია. პენიტენციურში, ასევე, ამბობენ, რომ მსგავსი უფლებით სარგებლობს ლაშა გოგიასთან ერთად დაკავებული მისივე ყოფილი მოადგილე, გია გულორდავაც.

25 ივნისს ზუგდიდის ყოფილ მერს ლაშა გოგიას კორუფციის საქმეზე ორი წლით თავისუფლების აღკვეთა და ოთხი წლით პირობითი მსჯავრი მიუსაჯეს. თბილისის საქალაქო სასამართლომ იგივე გადაწყვეტილება მიიღო ვიცე-მერის მოადგილის გია გულორდავას მიმართ. მსჯავრდებულები, 2018 წლის 1 ნოემბერს დააკავეს, მათ ბრალი წარდგენილი ჰქონდათ ჯგუფურად, განსაკუთრებით დიდი ოდენობით ქრთამის აღების ფაქტზე.